Pioli: Shitja e Tonalit te Newcastle ishte një mundësi e mirë për të gjitha palët e përfshira
Trajneri i Milanit, Stefano Pioli, në konferencën e parë për shtyp mbi sezonin e ri, ka folur për shitjen e mesfushorit Sandro Tonali te Newcastle Unitedi, për të cilën thotë se ishte mundësi e mirë për të gjitha palët e përfshira.
Trajneri i kuqezinjve foli në një konferencë për shtyp të hënën në fillim të para-sezonit të Milanit.
Ka pasur shumë ndryshime në Milanello tashmë, me largimin e ish-drejtorit dhe legjendës së klubit Maldini në fund të sezonit 2022/2023 dhe kalimin e Tonalit te Newcastle për 70 milionë euro.
Duke folur për transferimin e mesfushorit italian, Pioli tha: “Është një humbje e madhe nga pikëpamja teknike dhe ai duhet të zëvendësohet siç duhet. Ishte një mundësi e mirë për të dyja palët dhe për të, ishte e vështirë të bëhej diçka ndryshe”.
Kuqezinjtë kanë nënshkruar me Ruben Loftus-Cheek, por po kërkojnë më shumë përforcime në mesfushë, duke qenë se Ismael Bennacer do të mungojë për disa muaj për shkak të një dëmtimi në gju.
Afati kalimtar te Milani do të mbikëqyret nga CEO Giorgio Furlani dhe Shefi i skautimit, Geoffrey Moncada tani që Maldini dhe Ricky Massara janë larguar.
“Dua të falënderoj Maldinin dhe Massaran. Nëse jam këtu, është edhe falë tyre”, tha Pioli. “Gjithmonë jam ndjerë në qendër të projektit. Dikur flisja me Paolon dhe Rickyn, tani me Moncada dhe Furlani. Kam punuar shumë këtë muaj. Kam folur me lojtarë që mund të na ishin bashkuar në të kaluarën, kështu që puna ime nuk ka ndryshuar shumë. Dritarja jonë e transferimeve do të bazohet në ide. Ne kishim një marrëdhënie të shkëlqyer. Sigurisht që kishte disa argumente, sidomos kur fituam titullin, por respekti ishte gjithmonë aty”.
Milani nuk është skuadra e vetme e Serie A që fillon sot para-sezonin pasi lojtarët e Romës, Interit, Juventusit dhe Napolit janë mbledhur gjithashtu për testet mjekësore përpara sezonit të ri.
