Manchester City e gjen zëvendësuesin e Rodrit te Lazio

Raportohet në Itali se Manchester City po përgatitet për një ofertë në drejtim të Lazios për reprezentuesin italian, Nicolo Rovella, në tentim për të mbuluar hapësirën e lënë nga Rodri pas lëndimit serioz.

Sipas raportimit nga Il Messaggero, City mund të jetë potencialisht i prirur të ofrojë një marrëveshje fitimprurëse që në janar.

Raportet e së martës pohojnë se City po konsideron të bëjë një ofertë prej rreth 40 milionë eurosh për 23-vjeçarin, i cili bëri paraqitjen e tij të parë për kombëtaren e Italisë në nëntor.

Rovella teknikisht është ende në huazim nga Juventusi. Zonja e Vjetër e dërgoi atë te Lazio në një marrëveshje huazimi dy-vjeçare me detyrimin për të blerë në kushte të caktuara. Lazio do të paguajë një tarifë prej 17 milionë euro për ta bërë të përhershme lëvizjen e tij nga Torino.

Calciomercato vëren se nëse Manchester City do të dalë me një ofertë prej 40 milionë euro, atëherë Lazio do të merrte një fitim kapital prej 23 milionë euro.

City gjithashtu është lidhur me një lëvizje për një tjetër mesfushor italian. Bëhet fjalë për Samuele Ricci, i cili rastësisht ka një çmim prej 40 milionë euro sipas raportimeve të së martës.