Liga e Kombeve: Kosova e pret sot Qipron me synim për ta shpëtuar një fushatë tashmë dëshpëruese
Kosova do të përballet sot me Qipron në ndeshjen e fundit të fushatës së saj në Ligën e Kombeve, duke rrezikuar të bjerë një kategorinë e fundit nëse gjërat nuk shkojnë në të mirë të saj.
Kombëtarja e Kosovës është e dyta në Grupin 2 të Ligës C, me vetëm një pikë më shumë se Irlanda Veriore dhe Qipro në dy pozitat e fundit.
Dhe jo vetëm që s’e fitoi grupin por tani rrezikon të përfundojë e fundit.
Pasi dështoi të luftojë më Greqinë për ta fituar grupin – gjë që do t’ia siguronte një vend në play-off për t’u kualifikuar në Kampionatin Evropian 2024 – Kosova ia koklaviti vetes gjërat në dy ndeshjet e fundit duke rrezikuar të bjerë në Ligën D, të fundit për kah cilësua në futbollin evropian.
Nëse Kosova pëson disfatë dhe Irlanda Veriore e mund Greqinë – e cila e ka fituar grupin tashmë – barazon apo madje edhe nëse humb me më pak gola të pranuara se dardanët, atëherë Kosova do të bjerë në kategorinë e fundit.
Trajneri Alain Giresse – për të cilin kjo ishte fushata e parë në krye të Kosovës – këmbënguli në konferencë për media se verdhekaltrit mund ta mposhtë Qipron në Fadil Vokrri sonte në orën 20:45.
“Nesër kemi ndeshjen e radhës. Synimi ynë është fitorja. Synimi im është të përparojmë dhe të ngrihemi në nivel tjetër, por edhe të sjellim lojtarë të rinj. Kur e përgatisim një ndeshje, e përgatisim për ta fituar, sepse askush nuk dëshiron humbje. A po mendoni që shumë trajnerë i përgatisin dorëheqjet e tyre? Fillimisht asnjë trajner nuk mendon ta humbë ndeshjen”, tha Giresse të hënën në konferencë për media.
Kosova e mundi Qipron 2:0 në përballjen e parë në grup qershor dhe Irlandën Veriore në shtëpi, të cilat janë dy fitoret e vetme në pesë ndeshje.
Dy disfatat në përballje me Greqinë dhe sidomos humbja kundër Irlandës Veriore në Belfast të shtunën, pavarësisht se po e fitonte ndeshjen deri në dhjetë minutat e fundit, e kanë bërë vërtet zhgënjyese fushatën e tretë të Kosovës në Ligën e Kombeve.
Kjo fushatë e Ligës së Kombeve është parë edhe si mundësi shumë e mirë për trajnerin Giresse ta ndërtojë një ekip për kualifikime për Euro 2024 që nisin në mars të vitit të ardhshëm, por ai ka treguar pak shenja pozitive.