Legjenda e djajve të kuq: Martial nuk e meriton të luajë për Manchester Unitedin
Problemet e vazhdueshme me dëmtime kanë bërë që ylli francez, Anthony Martial, të luajë shumë pak për Manchester Unitedin dhe dëmtimi i tij i fundit do ta lë jashtë edhe në sfidën e së enjtes ndaj Real Betisit, teksa legjenda e djajve të kuq beson se sulmuesi nuk e meriton më të jetë në këtë skuadër.
Anthony Martial nuk duhet të luajë asnjë lojë tjetër për Manchester Unitedin, sipas ish-mbrojtësit të djathtë të djajve të kuq, Paul Parker.
Parker, i cili luajti për Unitedin për pesë vite nën drejtimin e Sir Alex Ferguson, kritikoi tendencën e Martial për t'u lënduar dhe tha se ai nuk përshtatet me mënyrën se si Erik ten Hag dëshiron të luajë.
"Unë nuk mendoj se ne do ta shohim më Martialin të luajë për Man United. Nuk mendoj se Erik ten Hag është aq i shqetësuar për këtë sepse Martial nuk përshtatet me mënyrën e tij të lojës," tha Parker. "Gjithashtu, ai nuk e meriton të luajë përsëri për Man Unitedin. Ai nuk ka shfrytëzuar shanset e tij dhe nuk po tregon fare qëndrueshmëri."
Martial ka bërë vetëm nëntë paraqitje nga fillimi këtë sezon në të gjitha garat për shkak të vështirësive të tij me fizikun, megjithëse ai ka arritur të shënojë gjashtë gola. Ai shënoi në ndeshjen e tij të fundit kundër Nottingham Forest më 1 shkurt, por nuk është paraqitur në nëntë ndeshje që atëherë për shkak të një dëmtimi në ije. Megjithatë, ai u kthye në stërvitje të mërkurën dhe potencialisht mund të rikthehet në ekipin e parë së shpejti.
Martial, i cili iu bashkua Unitedit nga Monaco në vitin 2015 për një tarifë prej rreth 60 milionë euro, i ka mbetur edhe një vit e gjysmë në kontratën e tij me klubin dhe Parker pret që ai të ndjekë rrugën e Cristiano Ronaldos dhe të largohet.
.jpg?format=jpg)
“Ai kurrë nuk e ka shijuar kohën e tij në Man United dhe tani duhet të vazhdojë përpara”, shtoi ai. “Nëse shikoni mënyrën se si ka qenë Ten Hag me disa lojtarë… Shikoni [Jesse] Lingard, shikoni [Paul] Pogba, shikoni Ronaldon, Martial do të duhet të largohet. Ai nuk është lojtari që ka qenë dikur."
Francezi nuk është me skuadrën për përballjen e së enjtes në Ligën e Evropës kundër Real Betis, por ekziston mundësia që ai të paraqitet në ndeshjen e së dielës në Premierligë kundër Southampton.
