Kompania që menaxhon Nagelsmannin sulmon Bayernin: Nuk kishte asnjë tentim nga klubi për të biseduar
Kompania që menaxhon trajnerin, Julian Nagelsmann, ka sulmuar Bayern Munichun, për publikimin e lajmeve për shkarkimin e gjermanit para se një i tillë t’i komunikohej atyre.
Bayerni u nda me trajnerin 35-vjeçar gjatë pushimit ndërkombëtar të marsit dhe e zëvendësoi atë me ish-trajnerin e Borussia Dortmundit, Thomas Tuchel. Klubi lëshoi deklaratën për largimin e Nagelsmann dhe ardhjen e Tuchel në të njëjtën ditë, edhe pse emri i ish-trajnerit të Chelseat u botua në media disa ditë më parë.
Agjencia menaxhuese e Nagestlmann, Sports 360 pretendoi se klubi nuk kontaktoi trajnerin përpara se t'i tregonte derën. Megjithatë, CEO Oliver Kahn i tha analistit të Sky Germany, Lothar Matthaus se ata nuk mund të planifikonin një takim personalisht me Nagelsmann pasi ai ishte me pushime. Ai më vonë pretendoi se trajneri ishte i informuar për shkarkimin e tij përpara se media të raportonte për të.
Duke folur për Sky Germany, Sports 360 tha: "Nuk ka pasur asnjë kontakt apo përpjekje për të kontaktuar nga Bayerni. Pas të gjitha thashethemeve në media, menaxhmenti i Julian Nagelsmann kontaktoi vetë Hasan Salihamidzicin."
Nagelsmann e kishte udhëhequr Bayern Munichun në çerekfinalen e Ligës së Kampionëve me një rekord perfekt, por ishte dy pikë prapa Dortmundit në garën për titull, pasi humbi nga Bayer Leverkusen pak para pushimit ndërkombëtar. Humbja bëri që zyrtarët e Bayernit ta shkarkonin atë dhe të sillnin Tuchel. Gjithashtu u raportua se trajneri u përplas me disa lojtarë, duke përfshirë nënshkrime të reja si Sadio Mane dhe Joao Cancelo, të cilët donin që Nagelsmann të largohej. Nga ana tjetër, lojtarë si Manuel Neuer dhe Joshua Kimmich donin që ai të qëndronte.
Matthaus ka mbështetur vendimin e klubit për të hequr qafe trajnerin, pasi ai e akuzoi atë për krijimin e shumë problemeve dhe parashikoi se Tuchel do të kishte sukses në Bavari.
