KATAR 2022 | Uruguai dhe Koreja Jugore pajtohen me nga një pikë

Kombëtarja e Uruguait dhe Koreja Jugore janë pajtuar me një barazim, në kuadër të xhiros së parë të fazës së grupeve në Kupën e Botës "Katar 2022".

Pavarësisht një lojë të tërë, asnjëra skuadër nuk arriti t'i finalizojë aksionet me rezultatin përfundimtar që doli të jetë 0:0.

Koreja Jugore dominoi më shumë gjatë pjesës së parë duke pasur disa raste të mira, por që nuk i konkretizuan.

Ui-Jo Hwang kishte një shans të mirë nga afërsia, por goditja e tij përfundoi mbi portë.

Në përfundimin e pjesës së parë, Uruguai ishte pranë të kalonte në epërsi me anë të Diego Godin, i cili me kokë goditi shtyllën (43').

Ndërkohë, gjatë 45-minutëshit të dytë loja ishte shumë më e hapur dhe e zhvilluar në mesfushë, ku nuk kishte ndonjë rast të rrezikshëm.

Në fakt, Darwin Nunez kishte disa mundësi të mirë shënimi por dështoi keq nga afërsia.

Vlen të ceket edhe goditja e bukur e mesfushorit Federico Valverde që ishte pranë të shënonte në fund duke goditur shtyllën (90').

Në anën tjetër, edhe Heung-min Son gjithashtu provoi nga distanca por edhe goditja e yllit të Tottenhamit përfundoi jashtë portës.

Kështu, Uruguai dhe Koreja Jugore ndajnë pikë në grupin H, duke ndarë përkohësisht kreun e tabelës.

Me fillim nga ora 17:00, do të nis ndeshja e dytë e këtij grupi mes Portugalisë dhe Ganës.

Në anën tjetër, xhiron e radhës Uruguai do të përballet me Portugalinë, derisa Koreja Jugore ndaj Ganës.