Jadon Sancho kompleton kalimin në Borussia Dortmund nga Manchester United

Ylli anglez, Jadon Sancho, më në fund është larguar nga Manchester United, duke kompletuar kalimin e tij te Borussia Dortmund në formë huazimi.

Dortmundi ka njoftuar se Sancho është rikthyer në klub në formë huazimi deri në fund të sezonit. Sancho zhvendoset pasi u përjashtua nga Manchester United pas një mosmarrëveshjeje me trajnerin Erik ten Hag. Ai rikthehet në Dortmund ku kaloi tre vjet përpara se të nënshkruante për Djajtë e Kuq në vitin 2021.

“Kur erdha në dhomën e zhveshjes sot, u ndjeva sikur të kthehesha në shtëpi. E njoh klubin brenda dhe jashtë, kam qenë gjithmonë shumë i afërt me tifozët këtu dhe kurrë nuk kam humbur kontaktet me ata që janë në krye”, tha ai për faqen zyrtare të Dortmundit.

“Mezi pres të shoh sërish shokët e skuadrës, të dal në fushë, të luaj futboll me një buzëqeshje në fytyrë, të asistoj në gola, të shënoj gola dhe të ndihmoj për t’u kualifikuar në Ligën e Kampionëve”.

Transferimi i lejon Sanchos mundësinë për të rikthyer karrierën e tij në rrugën e duhur në një klub që e njihte mirë. Anësori ka bërë vetëm tre paraqitje zëvendësuese deri më tani këtë sezon dhe nuk ka luajtur në ndeshje garuese që nga gushti. Dortmundi do të kontribuojë me 3.5 milionë euro (3 milionë £/3.8 milionë dollarë) për huazim, si dhe mbulon pjesën më të madhe të pagave të tij.

Sancho do të shpresojë se ai mund të ndikojë në Dortmund në gjysmën e dytë të sezonit, megjithëse nuk ka asnjë opsion blerjeje në marrëveshjen e tij të huazimit. Dortmundi kthehet në aksion të shtunën në Bundesligë kundër Darmstadt.