FFK del kundër UEFA-s, e vlerëson të butë gjobën që iu dha Rumanisë
Federata e Futbollit të Kosovës (FFK) ka njoftuar se do të paraqesin një tjetër padi në UEFA, lidhur me vendimin e “butë” që iu dha Federatës Rumune.
Pavarësisht thirrjeve të shumta “Kosova është Serbi” si dhe shfaqjen e një baneri, UEFA vendosi ta dënojë Rumaninë me vetëm një ndeshje pa shikues, si dhe gjobë prej 50 mijë eurove.
Kësisoj, FFK ka reaguar me anë të një komunikate zyrtare duke kërkuar që UEFA të jep një dënim shumë më të lartë, jo vetëm në aspektin financiar mirëpo edhe në forma të tjera.
Komunikata e plotë pa ndërhyrje:
“Federata e Futbollit e Kosovës shpreh pakënaqësinë e saj në lidhje me vendimin e organeve disiplinore të UEFA-s për të dënuar Federatën e Futbollit të Rumanisë me 50 mijë euro dhe një ndeshje pa shikues.
FFK-ja do të vazhdojë rrugën e saj ligjore dhe do të paraqesë ankesë në trupat përkatëse të UEFA-s, duke kërkuar që dënimi ndaj Federatës së Futbollit të Rumanisë të jetë sa më i lartë i mundshëm, jo vetëm në aspektin financiar, por edhe në forma të tjera, në mënyrë që të shërbejë si shembull se UEFA nuk do të tolerojë në asnjë mënyrë ofendime të tilla raciste ndaj një Federate anëtare të saj dhe ndaj një shteti të njohur ndërkombëtarisht.
FFK-ja është e përkushtuar që të kërkojë nga UEFA, që nëpërmjet dënimeve ndaj Federatës së Rumanisë t’ia bëjë të qartë çdo federate, grupi tifozësh apo çfarëdo grupi tjetër të interesit, se shteti i Kosovës, ekipi kombëtar i Kosovës dhe Federata e Futbollit e Kosovës, duhet të trajtohen dhe të respektohen në të njëjtën formë me çdo shtet, ekip kombëtar, e Federatë tjetër evropiane që është anëtare e UEFA-“, shkruhet në komunikatë.
Ndërkohë, me humbjen ndaj Rumanisë mund të thuhet se edhe u shuan gjasat e Kosovës për një kualifikim në Kampionatin Evropian “Euro 2024” që zhvillohet në Gjermani.
