Dorëzohet Jurgen Klopp: Nuk jemi më në garë për titull në Premierligë
Trajneri i Liverpoolit, Jurgen Klopp, e ka ngritur flamurin e bardhë duke thënë se skuadra e tij nuk është më në garë për titull në Premierligë, megjithëse janë zhvilluar vetëm tetë javë në sezonin 2022/23.
Liverpooli iu fut këtij sezoni me synimin për të garuar për më shumë trofe të mëdhenj, pasi sezonin e kaluar luftoi në të gjitha frontet.
Skuadra e Kloppit, megjithatë, ka vazhduar të pranojë gola dhe të lëshojë pikë me një ritëm alarmues, pasi u mposht 3:2 nga lideri i tabelës në Premierligë Arsenal të dielën në Londër.
I pyetur nëse Liverpooli vijon të mbetet në garë për titull me gjithë fillimin e dobët të sezonit, Klopp tha: “Po, jo në garë për titull”.
“Paramendojeni nëse ulëm këtu dhe mendoj se jemi afër. Natyrisht, në një gjendje si tonën, ne luajtëm kundër Arsenalit, tani luajmë kundër Rangers (në Ligën e Kampionëve) dhe pastaj kundër Man City, a është kjo mundësia e përkryer për ta kthyer vetëbesimin? Mbase jo”.
“Gjithmonë është kështu, në një gjendje si kjo: të gjithë mund të bëjmë pyetje, nuk mund të ndryshoj shumë. Nëse fitojmë, ka pesë milionë gjëra për të cilat mund të flasim, ‘ai është shumë i mirë, ai është super dhe golat e tij ishin të shkëlqyera’. Kur humb është gjithmonë njëjtë, bisedat janë më të vrazhda. Këtë nuk mund ta ndryshoj”, përfundoi ai.
Disfata në Stadiumin Emirates e ka lënë Liverpoolin në pozitën e 10-të në tabelën e Premierligës, pas vetëm dy fitoreve dhe 10 pikëve nga tetë ndeshje.
Me vetëm 10 pikë nga tetë ndeshje deri tani, ky është fillimi më i keq i sezonit në Premierligë për Liverpoolin që prej sezonit 2012/13 (9 pikë), kur e kishte përfunduar sezonin në vendin e shtatë.
Të kuqtë do të përballen me Rangers në udhëtim në Ligën e Kampionëve të mërkurën, para se ta mirëpresin kampionin në fuqi të Premierligë, Manchester City, të dielën në Anfield.
