Conte kritikon organet drejtuese të futbollit për mirëqenien e lojtarëve
Trajneri i Tottenham Hotspur, Antonio Conte, thotë se organet drejtuese të futbollit "nuk janë të shqetësuar" për mirëqenien e lojtarëve, duke parë orarin me të cilin zhvillojnë ndeshjet.
Cristian Romero, Richarlison dhe Son Heung-min do të humbasin ndeshjen e Spurs në shtëpi kundër Liverpoolit të dielën për shkak të lëndimeve që mund t'i mbajnë ata jashtë Kupës së Botës.
Premierliga ndërpritet një javë para fillimit të Kupës së Botës, më 20 nëntor, dhe rifillon shtatë ditë pas finales që zhvillohet më 18 dhjetor.
“Ky lloj orari është i çmendur”, tha fillimisht Conte.
“Shumë herë dëgjoj për mirëqenien e lojtarëve, por ata nuk shqetësohen vërtet për mirëqenien e lojtarëve nëse orari është ky. Në çdo moment ju tregoni se gjëja më e rëndësishme është që shfaqja duhet të vazhdojë”
Trajneri i Spurs ka kritikuar vendimin e FIFA-s për të luajtur Kupën e Botës në mes të sezonit, të marrë në një përpjekje për të ikur nga temperaturat në rritje të verës në vendin pritës në Katar, por italiani akuzoi gjithashtu Premierligën dhe UEFA-në për krijimin e një "situate të pamundur".
Ekipet në tre garat e kupave evropiane – Ligës së Kampionëve, Ligës së Evropës dhe Ligës së Konferencës, kanë luajtur tre ndeshje në javë për shumicën e tre muajve të fundit për të siguruar që fazat e grupeve të kishin përfunduar përpara fillimit të Kupës së Botës.
Conte vuri gjithashtu në pikëpyetje vendimin e Ligës Angleze të Futbollit për të caktuar ndeshjet e raundit të katërt të Kupës së Ligës për 20-22 dhjetor, me finalen e Kupës së Botës më 18 dhjetor dhe sezonin e Premierligës që rifillon më 26 dhjetor.
.png)
“Ne e dinim se ishte çmenduri të organizonim një Kupë Bote gjatë kampionatit dhe Ligës së Kampionëve. Sinqerisht, është vërtet e çuditshme në Angli që ne fillojmë të luajmë tre ditë pas finales së Kupës së Botës. Ne jemi i vetmi vend që e bëjmë këtë. Italia, Franca, Spanja dhe Portugalia dhe vende të tjera, po marrin kohë për të pushuar dhe për të marrë frymë pak.
Më duket çmenduri që 21 dhjetori, pas tre ditësh nga finalja, do të luajmë një ndeshje në Carabao Cup, më duket çmenduri. Pas tre ditësh duhet të luani përsëri në Premierligë. Shfaqja duhet të vazhdojë, kjo është e vërteta, por sinqerisht nuk më pëlqen”.
Megjithatë, trajneri i West Ham, David Moyes, skuadra e të cilit zhvilloi gjashtë ndeshje në grup në Ligën e Konferencës për të arritur në fazën eliminatore , thotë se situata është normale për këtë periudhë të vitit.
“Është koha e sezonit ku ndodhin lëndimet”, tha shefi i Çekanëve.
“Ne shkojmë në periudhën e Krishtlindjes ku ju po u kërkoni lojtarëve të luajnë një sasi qesharake lojërash për një periudhë të shkurtër kohe, por kjo është kultura jonë dhe kjo është ajo që ne bëjmë.
“Por për ta theksuar më shumë tani, ndoshta ka të njëjtin numër lëndimesh si sezonin e kaluar kur nuk kishte Kupën e Botës, kështu që nëse njerëzit janë të befasuar, atëherë nuk duhet të jenë”, përfundoi ai.
