Chelsea e konfirmon marrëveshjen 73.5 milionë euro për Cucurellan

Chelsea ka arritur marrëveshje me Brightonin për ta blerë mbrojtësin Marc Cucurella, në një marrëveshje që e kap shifrën e 73.5 milionë eurove duke përfshirë bonuset.

Mbrojtësi spanjoll ishte i shumëkërkuar këtë verë, veçanërisht nga Manchester City dhe Barcelona.

Pasi iu bashkua Brightonit në verën e vitit 2021 nga skuadra spanjolle Getafe për rreth 18 milionë euro, dhe pas një viti po largohet për një shumë marramendëse.

Ai kishte sezon të mrekullueshëm me Brightonin duke u shpallur Lojtari më i Mirë i Sezonit nga ky klub.

“Pas raportimeve të shumta nëpër media këtë javë, mund të konfirmojmë se kemi arritur marrëveshje me Brightonin për blerjen e Marc Cucurellas”, thuhet në njoftimin e Chelseat.

Chelsea do t’ia paguajë Brightonit 65 milionë euro, plus 8.5 milionë euro të tjera bonuse lehtë të arritshme për blerjen e Cucurellas.

Kalimi i mbrojtësit spanjoll te Chelsea shkaktoi goxha polemika gjatë kësaj jave, pasi Brightoni e mohoi marrëveshjen në fillim të kësaj jave.

Megjithatë, kalimi i tij tek te kaltrit është punë e kryer tashmë, pasi Chelsea e konfirmoi marrëveshjen përmes një komunikate në Twitter.

Cucurella kërkohej edhe nga Manchester City në fillim të kësaj vere, por kampioni anglez nuk pranoi ta paguajë çmimin e lartë që Brightoni kërkonte për lojtarin.

City bëri ofertë prej 35.5 milionë eurove, e cila u refuzua menjëherë nga Brightoni. Oferta e dytë dhe e fundit e kampionit në fuqi ishte 47 milionë euro, e cila u hodh poshtë po ashtu.

Për dallim nga City, Chelsea ishte i gatshëm ta paguajë shumën e kërkuar nga Brightoni dhe ia doli të arrijë marrëveshje për mbrojtësin e krahut të majtë.