Carvajal thotë se Spanja nuk është shtet racist, pavarësisht që shoku i tij i skuadrës vazhdon të abuzohet
Ylli i Real Madridit, Dani Carvajal, ka thënë se shteti spanjoll nuk është shtet racist, pavarësisht se në mënyrë të përsëritur është abuzuar në baza racore shoku i tij i skuadrës, Vinicius Junior.
Vinicius është vënë në shënjestër të tifozëve në Spanjë në disa incidente të profilit të lartë dhe sulmuesi brazilian është shprehur kundër abuzimit, duke premtuar se do të vazhdojë luftën e tij kundër racizmit në vendin evropian. Anësori shpërtheu në lot në një konferencë për shtyp pasi u pyet për përvojën e tij me fyerjet, por Carvajal thotë se Spanja nuk është një vend racist.
“Është një mjedis dhe ndeshje ideale për të përballuar luftën kundër racizmit”, tha reprezentuesi spanjoll. "Vinicius flet për këtë me rrethin e tij intim, ne e ndihmojmë me aq sa mundemi në dhomën e zhveshjes. Nuk mendoj se Spanja është një vend racist, mendoj se kemi një nivel shumë të lartë integrimi. Unë vij nga Leganes dhe jam rritur me fëmijë nga të gjitha vendet. Fatkeqësisht, ka njerëz që shkojnë në futboll për të shfryrë zemërimin e tyre. Nëse ka një lloj komenti që mund të lëndojë dikë, njerëzit shkojnë në atë rrugë."
Carvajal dhe Vinicius do të ndeshen kokë më kokë këtë javë kur Spanja do të përballet me Brazilin në një miqësore ndërkombëtare. Mbrojtësi i djathtë ka premtuar se nuk do ta ketë të lehtë kundër yllit brazilian, duke thënë: "Mund të dëmtosh veten më shumë duke bërë ndërhyrje të dobëta sesa duke u bërë i fortë në duele. Duke qenë takim miqësor, ka veprime në të cilat mund të rregullosh veten, të mos shkosh sa të kalosh kufirin. Nga ana ime nuk do të ruhem për asgjë. Vinicius më befasoi për mirë dhe përmirësimi që ka treguar ka qenë spektakolar. Ai mori shumë kritika dhe disa lojtarë nuk ia dolën dot për ta kapërcyer atë. Ai tani është një nga udhëheqësit tanë."
La Roja pret Selecao në një miqësore të martën. Brazili i afrohet ndeshjes pasi mundi Anglinë 1:0 përmes një goli të vonuar nga Endrick, ndërsa Spanja rezultoi fituese 1:0 kundër Kolumbisë javën e kaluar.
