Smajljaj: Vlerat enveriste dhe titiste janë ende goxha prezente në Kosovë
Politologu Avdi Smajljaj ka bërë me dije se vlerat enveriste dhe titiste janë ende goxha prezente në nivele të ndryshme shoqërore në Kosovë.
Në profilin e tij në “Facebook”, ai ka shkruar se prezenca e këtyre vlerave është ndër arsyet kryesore të ngecjes në zhvillimin e demokracisë, liberalizmit, e pluralizmit te ne.
“Enverizmi sot nuk është forcë politike e organizuar me rol signifikant në skenën politike. Kjo edhe për arsye se ka një kontekst tjetër ndërkombëtar, në të cilin është shumë vështirë të ngjallet enverizmi si regjim autoritar/totalitar dhe si verzion i ideologjisë marksist-leniniste. Megjithatë, vlerat enveriste e titiste, autoritare/totalitare janë ende goxha prezente në nivele të ndryshme shoqërore, tek masat dhe një pjesë e konsiderueshme e elitave”, ka shkruar ai.
Ai ka bërë me dije se diktatori Enver Hoxhaj është nder figurat më të errëta shqiptare.
“Prezenca e këtyre vlerave është ndër arsyet kryesore të ngecjes në zhvillimin e demokracisë, liberalizmit, e pluralizmit te ne. Për këtë ka shpërputhje të madhe në mes kushtetutës, institucioneve formale, e ligjeve në njërën anë, dhe qëndrimeve e sjelljeve ndryshe të shoqërisë sa i përket lirisë e pluralizmit në anën tjetër. Kjo e rritë informalitetin në politikë. Enver Hoxha si diktator autoritar/totalitar e si verzion i marksist-leninizmit është figura më e errët shqiptare”, ka shkruar Smajljaj.
