Kurti s’i dëgjon SHBA-në e BE-në, profesori amerikan: Ato s’e kompromentojnë pavarësinë, pasi janë garantuesit e saj
Profesori amerikan në Universitetin e Nju Jorkut, Alon Ben – Meir ka thënë se nëse Qeveria e Kosovës pranon shtyrjen e vendimit për targa, kjo nuk kompromenton pavarësinë e vendit, por vetëm lejon kohë shtesë për një marrëveshje më gjithëpërfshirëse me Serbinë drejt njohjes së vendit.
Ben-Meir në një shkrim në Facebook, ka thënë se kryeministri Albin Kurti duhet ta shohë kërkesën e SHBA-së dhe BE-së në kontektin e krizës pas luftës në Ukrainë.
“Nëse Kurti pranon shtyrjen e marrëveshjes së targave, kjo në asnjë mënyrë nuk do të komprometonte pavarësinë e Kosovës, thjesht do të lejonte kohë shtesë për të arritur një marrëveshje më gjithëpërfshirëse me Serbinë drejt njohjes së Kosovës. Shorti i Kosovës është hedhur me SHBA-në dhe BE-në dhe Kurti duhet ta shohë kërkesën e tyre për të shtyrë zbatimin e marrëveshjes së targave në kontekstin e krizës për luftën në Ukrainë, e cila po shqetëson të gjithë kontinentin”, ka thënë ai.
Në fund, profesori amerikan bëri me dije se Bashkimi Evropian e Shtetet e Bashkuara nuk e kompromentojnë pavarësinë e Kosovës, pasi që janë garantuesit e saj.
“As BE-ja dhe as SHBA-ja nuk duan të komprometojnë pavarësinë e Kosovës pasi kanë qenë dhe vazhdojnë të jenë garantuesit përfundimtarë të sigurisë kombëtare dhe pavarësisë së Kosovës”, ka thënë ai.
Vendimi i Kurtit dhe reagimet e partnerëve ndërkombëtarë
Kryeministri i Kosovës, Albin Kurti javën që lamë pasë konfirmoi një plan për ta shkallëzuar vendimin për targat, i cili ka nisur që të zbatohet nga 1 nëntori.
“Shkallëzimi” i Kurtit ndahet në tri masa, fillimisht qortim tri javë, masë e gjobitjes dy muaj, targa provuese dy muaj dhe nga prilli konfiskim.
Ditën kur komunikoi planin e ri, Kurti para gazetarëve tha se kjo nuk nënkupton që zbatimi i vendimit është shtyrë, por vetëm është shkallëzuar.
“Ne nuk e kemi shtyrë zbatimin e vendimit, e kemi shkallëzuar atë, dhe mendojmë se kjo është zgjidhja më e mirë tani. Në javën e parë të nëntorit e kemi Samitin e Procesit të Berlinit që do të mbahet me kancelarin Scholz. Por gjithashtu do të kemi edhe takime të tjera të rëndësishme, për pozicionin e Kosovës në Bashkimin Evropian. Jemi të vetëdijshëm që ka një fushatë agresive, kriminale, e cila vjen nga Serbia kundër serbëve të Kosovës, dhe gjitha këto na kanë bërë të mendojmë që zbatimin e vendimit ta përshkallëzojmë”, tha kryeministri.
Me këtë plan të kryeministrit të vendit, nuk u pajtuan SHBA-ja dhe BE-ja të cilat kërkuan sërish që afati i zbatimit të vendimit të shtyhet, derisa u shprehen qartë se janë të zhgënjyera.
Në një komunikatë të DASH-it, shprehej zhgënjimi dhe shqetësimi i Amerikës pasi nuk u dëgjua kërkesa e tyre.
“Shtetet e Bashkuara janë të zhgënjyera dhe të shqetësuara që Qeveria e Kosovës ka refuzuar kërkesat për ta bërë këtë nga partnerët e saj ndërkombëtarë. Kosova dhe Serbia duhet të punojnë urgjentisht dhe në mënyrë fleksibël për të arritur një marrëveshje gjithëpërfshirëse për marrëdhëniet e normalizuara, me në qendër njohjen reciproke”, përfundon komunikata.
Bashkimi Evropian ndërkaq, tha se vendimi është hap në drejtimin e duhur, por nuk është në përputhje me Marrëveshjet e Dialogut.
“Ndërsa vendimi është një hap në drejtimin e duhur, ai nuk është në përputhje me Marrëveshjet e Dialogut, të cilat janë të detyrueshme për të dyja palët. Marrëveshja përkatëse e vitit 2016 parashikonte një proces të renditur dhe të përcaktuar qartë me një afat kohor 12-mujor për procesin e largimit, i cili nuk është ndjekur. Kosova duhet të lejojë një periudhë më të gjatë tranzicioni. Kjo ka qenë këshilla e vazhdueshme e partnerëve më të afërt të Kosovës, përfshirë BE-në dhe SHBA-në. Është zhgënjyese të shohësh se nuk është ndjekur”, thekson komunikata.
