Pse vetëm "dy ambasadorë e gjysmë" të Quintit i shkuan Kurtit në Zyre dje?
Kryeministri i Kosovës, Albin Kurti, dje ka pritur në takim përfaqësuesit diplomatikë të Francës, Italisë dhe Gjermanisë, dhe ku duket se është folur edhe në lidhje me takimin e nivelit të lartë të 2 majit. Dhe si shumçka tjetër, edhe ky takim rrit konfuzionin në lidhje me procesin e dialogut.
Zyra e Kryeministrit njoftoi për takimin në fjalë gjatë ditës së djeshme.
Megjithatë, domethënëse në këtë takim ishte përbërja e diplomatëve që i shkuan në zyrë Kurtit.
Gjysmë-Quinti
Para Kurtit ishin shfaqur – thënë kushtimisht – “dy ambasadorë e gjysmë” nga pesëshja e Quintit (ShBA, Mbretëria e Bashkuar, Gjermania, Franca dhe Italia).
Te Kurti ishte ambasadori i Francës, ambasadori i Italisë dhe zv. ambasadori i Gjermanisë. Pra, nuk ishte askush nga ShBA-ja dhe Mbretëria e Bashkuar derisa edhe Gjermania ishte e nënpërfaqësuar në krahasim me dy shtetet tjera partnere të Kosovës.
Ishte ambasadori i Francës njeriu kryesor nga ana e diplomatëve të këtyre tri shteteve.
Çka tha Kryeministria?
Në njoftimin e lëshuar për medie, Kryeministria pretendon të jetë folur për procesin e anëtarësimit të Kosovës në Këshillin e Evropës, për procesin e zbatimit të Marrëveshjes Bazë me Serbinë dhe Aneksit të Zbatimit, si dhe për takimin e 2 majit në Bruksel.
“Ndërkaq në lidhje me takimin e radhës të nivelit të lartë politik, ai tha se pret angazhim konstruktiv që siguron zbatim pa vonesë e të plotë të të gjitha neneve të dakorduara.” – shkruan ZKM-ja.
Aty po ashtu u dënuan edhe sjelljet e Serbisë që sipas Kryeministrisë shkelin Marrëveshjen Bazë.
Në këtë takim, raportohet nga Kryeministria se Kurti iu ka kërkuar këtyre shteteve që ta vazhdojnë mbështetjen e Marrëveshjes Bazë “deri në zbatimin e plotë të saj.” Ndërsa, përkundër që e ka përmendur mbështetjen e Gjermanisë, Francës, Italisë dhe ShBA-ve ai nuk ka përmendur edhe mbështetjen nga ana e Mbretërisë së Bashkuar.
Mbretëria e Bashkuar kishte mbështetur procesin e dialogut në Bruksel, por që nga 18 marsi (Marrëveshja e Ohrit) megjithatë kanë munguar deklaratat inkurajuese për Kosovën.
Zbatimi?
Ambasadori i Francës, Olivier Guerot, ka qenë kritik ndaj zgjedhjeve që u mbajtën javën e kaluar në veri për dallim nga kolegët e tij të tjerë nga Qunti që kishin thënë se rezultatet do të pranoheshin.
“Zgjedhjet me kaq pak votues nuk i kontribuojnë zgjidhjes politike...” – kishte thënë ai.
Të paktën publikisht nuk është thënë se temë e këtij takimi kanë qenë zgjedhjet në katër komunat veriore me shumicë serbe.
Sa i përket asaj që u tha se është folur, zbatimit të Marrëveshjes Bazë dhe Aneksit të Zbatimit, Qeveria e Kosovës me anë të ministrit Elbert Krasniqi sot në mëngjes ka njoftuar se më datën 18 prill e kishte ftuar për takim ekipin menaxhues për draftimin e Asociacionit të Komunave me Shumicë Serbe.
Një deklaratë pak më të ndryshme dje e kishte bërë kryeministri Kurti, duke lënë të nënkuptohej se kishte pasur edhe ftesa tjera.
“...ministri im Elbert Krasniqi i ka bërë ftesë për takim këtyre mirëpo ata nuk janë përgjigje asnjëherë.” – kishte thënë z. Kurti.
Përgjegjësia për të ofruar një draft në lidhje me statutin në bazë të marrëveshjeve të prillit ishte pikërisht te ekipi menaxhues, siç e kishte potencuar edhe kryeministri i Kosovës.
“Draft-statute në të kaluarën kanë konsideruar që e ka për detyrë (që t’i shkruajë) ekipi menaxhues.” – kishte thënë tutje Kurti, duke treguar se më 18 mars nuk e kishin lënë që draft-statutin ta shkruante vetë ai.
ShBA-ja
Emisari i posaçëm i ShBA-ve për Ballkanin Perëndimor, Gabriel Escobar, kishte kërkuar në anën tjetër që Kosova ta kishte një propozim konkret për Asociacionin deri më 2 maj.
“Shpresoj që deri më 2 maj të ketë një propozim konkret (për Asociacionin)” – ishte shprehur z. Escobar.
“Është një detyrim ekzistues në bazë të marrëveshjes së Brukselit dhe ishte shumë e vështirë për këtë qeveri dhe parti që ta pranonte si të detyrueshme. Por tani po e konsiderojnë si detyrim, janë pajtuar me të dhe kanë thënë publikisht se cila duhet të jetë korniza dhe parametrat e Asociacionit. Dhe ne pajtohemi me këto parametra.” – kishte vazhduar ai.
Ambasadori Hovenier së bashku me ambasadorin Abbott nga Mbretëria e Bashkuar u panë sot bashkë me Kurtin në një aktivitet për personat e pagjetur.
