"Penguan punëtorët që pastronin disa grafite me mbishkrime nacionaliste": Lirohet Aleksandar Arsenijeviq
Policia e Kosovës ka bërë të ditur se është lirurar politikani serb nga veriu i Kosovës, Aleksandar Arsenijeviq dhe një tjetër.
Sipas policisë, ata dy kishin penguar punëtorët që ishin “kontraktuar dhe të angazhuar nga autoriteti kompetent, për të pastruar disa grafite me mbishkrime nacionaliste, që krijojnë nxitje dhe urrejtje si "severna brigada" etj. të cilat ishin në shesh afër urës.”
Pas intervistimit në Policië, ata janë liruar.
Njoftimi i plotë:
KOMUNIKATË PËR MEDIA
Prishtinë, 8 gusht 2024
Sot, me datën 08.08.2024 rreth orës 11:00, disa persona të nacionalitetit serb ishin tubuar në një lokacion afër urës në Mitrovicë Veri dhe të njëjtit kanë filluar të pengojnë punëtorët të cilët ishin të kontraktuar dhe të angazhuar nga autoriteti kompetent, për të pastruar disa grafite me mbishkrime nacionaliste, që krijojnë nxitje dhe urrejtje si "severna brigada" etj. të cilat ishin në shesh afër urës.
Personat në fjalë janë paralajmëruar disa herë që të mos pengojnë punën dhe të largohen, mirëpo të njëjtit kanë vazhduar duke penguar dhe duke mos lejuar realizimin e punimeve, si dhe kanë provokuar dhe kanë nxitur tensione.
Njësitet policore relevante, me qëllim të qetësimit të situatës dhe krijimit të mundësive për punë, janë detyruar të veprojnë dhe kanë shoqëruar në stacion policor për intervistim dy persona.
Personat e shoqëruar në stacion policor, pas intervistimit janë liruar.
