Njeriu i afërt i Kurtit ngjall dyshime për tenderin 12 milionësh të Përparim Ramës - NACIONALE

Njeriu i afërt i Kurtit ngjall dyshime për tenderin 12 milionësh të Përparim Ramës

1 javë më parë

nga Muharrem Kafexhiu

Një tender 12 milionësh i shpallur nga Komuna e Prishtinës ka rënë në radar të Lëvizjes Vetëvendosje. Me ketë nismë të komunës që drejtohet nga Përparim Rama, është marrë një njeri i afërt i kryeministrit Albin Kurti.

Enis Sulstarova, aktivist i njohur i VV-së nga Shqipëria, ka bërë një postim në lidhje me tenderin që synon të kontraktojë një konsulencë për themelimin e shërbimit të arkitektit të kryeqytetit.

Ai ka ngritur dyshime për këtë iniciativë të Ramës, i cili e mposhti partinë e Sulstarovës në garën për të marrë drejtimin e Prishtinës.

“12 milionë euro konsulencë për komunën e Prishtinës. Sa ishte borxhi i kryetarit kur mori detyrën?”, pyeti Sulstarova, duke ngjallur kështu dyshimet e tij.

Por, sa është borxhi total i Përparim Ramës?

Përparim Rama në deklarimin e pasurisë ka thënë se pasuria e tij totale, e zbritur me borxhe, kalon shifrën prej 17 milionë eurosh.

Ndërkohë që vetëm piktura, të trashëguara nga familja – siç ka thënë ai – kapin vlerën e 4 milionë eurove në sytë e të parit të Prishtinës.

Rama më së shumti ka pasuri të paluajtshme [14.5 milionë euro] ku vetëm një rezidencë kap vlerën e gati 5 milionë eurove. Ndërsa tri banesa tjera kanë vlerë 4 milionë e gjysmë euro.

Rreth 4 milionë e gjysmë euro tjera aksione, i pari i Prishtinës, i posedon në 11 shoqëri komerciale.

Por, krahas këtyre milionave, Rama ka edhe miliona të tjera borxh në formë të kredive ndaj 7 bankave dhe 5 personave tjerë – gjithsej 5.8 milionë euro.

Në fund, Rama përmes të hyrave vjetore, ka deklaruar se fiton rreth 106 mijë euro, që i bie se i pari i Prishtinës i fiton rreth 8 mijë e 800 euro rroga.

Kujtojmë faktin se arkitekti nga Londra mposhti njërin prej kandidatëve më të fortë të VV-së, Arben Vitinë, në balotazhin e garës për kryeqytetin me 14 nëntor të 2021-tës.

Lajmi se Komuna e Prishtinës hapi tender për konsulencë në vlerë prej 12 milionë eurove u konfimua sot.

Nacionale ka dërguar pyetje tek autoritetet gjegjëse komunale, por ata kanë kthyer një përgjigje duke na drejtuar te fakti që kontrata është publike.

Shefi i kabinetit të kryetarit të Kuvendit, Ilir Kërçeli, përmes një postimi në rrjetin social “Facebook” ironizoi me kryetitullin: Prishtina e përjetimeve!, që në fakt ishte një prej slloganeve të Përparim Ramës në zgjedhjet lokale të vitit të kaluar.

“Prishtina e përjetimeve! 12 milionë euro per konsulencë me pritu me i shkru zerot se le ma me mendu që vetëm për konsulencë. A e kane lluksin qytetarët e Prishtinës që 4-5 % buxhetit të Komunes me dërgu në konsulencë? Konsulencë për çka? Për me kriju një shërbim brenda komunës, konsulence se qysh me u kriju ai shërbim, i bie qe as mu kriju me këto mjete jo.Veç imagjinojeni sikur kryetari të ishte nga Vetëvendosje!”, shkroi ai.

Kush është Përparim Rama?

Përparim Rama u lind në Prishtinë më 20 janar 1976.

Në vitin 1992, në moshën 16-vjeçare u shpërngul në Britani të Madhe ku përfundoi edhe studimet për arkitekturë.

Ai ka përvojë mbi 20 vjet në projekte të ndryshme në banesa e hotele.

Në vitin 2012, në Bienalen e Arkitekturës në Venecia, Rama përfaqësoi Kosovën për herë të parë në histori me veprën e quajtur “Punuesi i filigranit”

Në maj të vitit 2021, kryetari i Lidhjes Demokratike të Kosovës, Lumir Abdixhiku, prezantoi Ramën si kandidatin e kësaj partie për të parin e Prishtinës.

Përparim Rama është i martuar dhe ka tre fëmijë.

Lajme të ngjashme