S’ka se s’ka Kuvend, sajimi i ri i VV-së: Kurti do ‘bisedime’ me Hamzën dhe Abdixhikun për Nënkryetarët e Kuvendit

Albin Kurti i Vetëvendosjes “si mazhorancë parlamentare” nuk do t’u votojë dy partive opozitare të propozuarit e tyre për Nënkryetarë të Kuvendit.

Kësisoji duke e ndaluar procesin e konstituimit të Kuvendit të Kosovës, i cili proceduralisht përfundon me zgjedhjen e pesë Nënkryetarëve.

Vlora Çitaku e PDK-së dhe Kujtim Shala i LDK-së nuk do të marrin votat e Vetëvendosjes për Nënkryetarë të Kuvendit.

Kjo s’do të jetë çështje për Vetëvendosjen nëse dy partitë opozitare nuk bëjnë marrëveshje me Albin Kurtit, sipas këtij të fundit.

“Atyre u duhen votat tona,” tha ai para gazetarëve.

Kurti tha se u ka shkruar Bedri Hamzës së PDK-së dhe Lumir Abdixhikut të LDK-së nëse ata duan marrëveshje për Nënkryetarët.

“Meqenëse u nevojitet mbështetja e mazhorancës, edhe për propozimet e tyre, le të jemi pozitiv dhe konstruktiv.”

“Dhe në këtë mënyrë të kemi kuvend të konstituar e shpejt qeveri të formuar e president, në mënyrë që të evitojmë zgjedhjet...”

“Duhet të kemi dakordim për nënkryetarët dhe shpresoj që ta arrij sa më parë me Bedri Hamzën dhe Lumir Abdixhikun.”

Seanca u ndërpre, ndërsa Albulena Haxhiu, Kryetare e zgjedhur e Kuvendit, njoftoi vazhdimin për të premten në ora 11:00.

Haxhiu tha se deklarimet e Igor Simiqit të Listës Serbe si “në emër të popullit serb” lanë pa vota Nënkryetarin serb.

“Seanca vazhdon të premten në ora 11:00,” tha ajo.

Opozita e interpretoi ndërprerjen si dëshmi se Vetëvendosja nuk synon ta përmbyllë konstituimin.

Avdullah Hoti i LDK-së tha se moskonstituimi i Kuvendit nga Vetëvendosje është i qëllimshëm.

“Nuk pritet gjë tjetëer nga ta,” tha Hoti para gazetarëve.

Sipas tij, synimi është “për të çuar zgjedhjet me datën që atyre u konvenvon” dhe ikja nga problemet.

“Kryesorja mendoj ikja nga përgjegjësia prej Marrëveshjes së Brukselit dhe Ohrit,” tha ai.

Hykmete Bajrami e LDK-së tha se tashmë është e qartë se kush po bllokon formimin e institucioneve.

“Kush po i bllokon institucionet? Sot besoj se e patë të gjithë”, shkroi ajo në Facebook.

Nga PDK-ja, Përparim Gruda tha se partia do të votonte “në çfarëdo forme” për Nënkryetarët, vetëm që të themelohej legjislatura.

“PDK voton çdo formë dhe çdo procedurë. Sepse është momenti historik 16 shtatori. Ne nuk mund të mos kemi kuvend më 16 shtator.”

Gruda tha se VV-ja kishte ardhur “për një lojë të radhës politike” dhe se “qëllimi është të mos e konstituojnë Kuvendit”.

Kryetari i Aleancës, Ardian Gjini, e quajti dështimin e seancës “skenar të planifikuar” të Albin Kurtit dhe Listës Serbe.

“Është një maskaradë për ta zvarritur procesin ashtu siç u përshtatet atyre”, ka deklaruar ai.

Gjini ftoi edhe partitë e tjera opozitare të mos bëhen pjesë e procesit dhe tha se Aleanca e kishte paralajmëruar këtë skenar.

“Prej korrikut ju kam treguar që kjo ka për të ndodhur”, është shprehur Gjini.

Sipas tij, VV-ja synon zgjedhje të reja në fund të vitit, me afate që do të çonin drejt 27 dhjetorit.

“Ky nuk dëshiron të qeverisë, ky dëshiron të sundojë. Ky ka qenë skenar që nga fillimi,” tha ai.