"Ndalje arbitrare e qytetarëve": MPJ dhe MPB reagojnë pas bllokimit të udhëtarëve në kufirin Serbi-Kroaci
Ministria e Punëve të Jashtme dhe Diasporës dhe Ministria e Punëve të Brendshme kanë kërkuar nga qytetarët të evitojnë kalimin nëpër Serbi. Ky njoftim vjen pasi rreth 300 kosovarë janë bllokuar në pikën kufitare Serbi-Kroaci. Autobusët me qytetarë të Kosovë nuk po lejohen të kalojnë nga autoritetet kufitare serbe.
MPJD-ja dhe MPB-ja kanë thënë se për shkak të ndaljes arbitrare të qytetarëve të Kosovës, kanë kërkuar që të evitohet me “çdo kusht” kalimi nëpër Serbi.
“INFORMACION I RËNDËSISHËM PËR TË GJITHË ATA QË SHFRYTËZOJNË HYRJE-DALJET E SERBISË Ministria e Punëve të Jashtme dhe Diasporës dhe Ministria e Punëve të Brendshme njoftojnë se pas situatës së krijuar në pikat kufitare në Serbi dhe ndaljes arbitrare të qytetarëve të Kosovës në vendkalime kufitare, të gjithë bashkatdhetarët dhe qytetarët që janë në lëvizje të evitojnë me çdo kusht kalimin nëpër Serbi.” – thuhet në njoftim.
Më tej, këto dy ministri kanë konfirmuar se janë duke ndërmarrë veprimet e nevojshme dhe kanë kërkuar që të ndjeket me vëmendje “situata e tensionuar e sigurisë”.
“MPJD dhe MPB janë duke ndermarrë veprimet e nevojshme dhe do t’iu mbajnë të informuar rreth detajeve të reja.Të gjithë udhëtarët luten që të ndjekin me vëmendje situatën e tensionuar të sigurisë dhe të mos udhëtojnë përmes Serbisë.”
“Duke marrë parasysh faktin që në qarkullim janë shumë lajme të rreme, të cilat synojnë përhapjen e frikës dhe kaosit, ju lusim të ndiqni @Kosovo_Police rreth përditësimeve më të fundit zyrtare në këtë drejtim.” – përfundon njoftimi i publikuar në Facebook.
Nga ana tjetër, sekretari i zyrës ndërlidhëse të Kosovës në Beograd, Fatmir Haxholli, ka konfirmuar se katër autobusë janë bllokuar në kufirin Serbi-Kroaci nga autoritetet kufitare të Serbisë.
Haxholli ka thënë se kjo gjë po bëhet si shenjë “hakmarrje dhe nervozizëm absurd ndaj votimit të Asamblesë Parlamentare të Këshillit të Evropës”.
Ai ka thënë se janë rreth 300 qytetarë të bllokuar.
“Bllokimi i mbi rreth 300 qytetarëve, duke ua mbajtur pasaportat dhe dokumentacionet e udhëtimit, është shkelje flagrante jo vetëm e marrëveshjeve të Brukselit, por edhe e të drejtave universale të njeriut të garantuara me të gjitha konventat ndërkombëtare. Vetëm regjimet më autoritare i bllokojnë udhëtarët e një vendi tjetër, me shpjegimin 'ky është një urdhër nga Beogradi'.” – ka shkuar ai.
“Duke qenë që Zyra Ndërlodhëse serbe nuk po komunikon me Zyrën tonë, siç ndodhi edhe këtë mëngjes, kam kërkuar dhe jam në pritje të përcjelljës së afërt, që të udhëtoj drejt pikëkalimit Batrovci, për t'ju gjetur pranë bashkëqytetarëve tanë dhe në shenjë proteste ndaj këtij zhvillimi.” – ka thënë ndër të tjera ai.
Nacionale ka siguruar pamje nga bllokimi i autobusevë dhe mund ta shikoni më poshtë:
