Konfirmohet më në fund: Vjosa Osmani është operuar
Më në fund është konfirmuar: Presidentja e Republikës së Kosovës, Vjosa Osmani është operuar.
Këtë e konfirmoi para pak çastesh Presidenca. Më poshtë edhe komunikata, teksa lajmi është në përditësim.
Siç bëhet e ditur në këtë komunikatë, Osmani i është nënshtruar një intervenimi të lehtë kirurgjik, (heqja e tëmthit).
"Zyra e Presidentes së Republikës së Kosovës njofton opinionin publik se dje (2 nëntor), pas rekomandimit nga mjekët specialistë, Presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses. Bazuar në vlerësimin dhe vullnetin e saj, gjatë ditës së djeshme, Presidentja Osmani ka bërë bartjen e përkohshme të përgjegjësive të Presidentes së Republikës tek Kryetari i Kuvendit të Republikës së Kosovës, z. Glauk Konjufca.
Nga 3 nëntori, Presidentja do të vazhdoj me ushtrimin e detyrave dhe obligimeve kushtetuese që ndërlidhen me pozitën e Presidentes së Republikës, si dhe gradualisht do t’i kthehet angazhimeve publike. Gjatë kësaj periudhe, kërkojmë mirëkuptimin e medieve për të respektuar të drejtën fundamental për privatësi të Presidentes, që është e garantuar me kushtetutë."
Çka raportoi Nacionalja?
Kujtojmë se ishte Gazeta Nacionale ajo që duke u thirrur në burimet e saj, raportoi për shtrirjen e Vjosa Osmanit në spitalin privat "Aloka".
Veç kësaj, Nacionale telefonoi edhe drejtorin e këtij spitali privat, Halit Maloku.
Ky i fundit, para pak kohësh nuk e kishte pohuar e as mohuar praninë e Osmanit në spitalin ku ai ushtron detyrën e drejtorit.
Nacionale përmes burimeve kishte mësuar se presidentja e vendit Vjosa Osmani është shtrirë në spital, gjë kjo më pas e konfirmuar nga gazetarët që kanë shkuar në spitalin e përmendur.
Burimet i kishin thënë gazetës se bëhet fjalë për një problem në idhëz, e për të cilin mund t’i jetë dashur operacioni.
“Problemi në idhëz mund t’i jetë shkaktuar nga dieta,” – i tha ai Nacionales. Veturat e Presidencës janë parë jashtë spitalit Aloka nga gazetarët e Nacionales.
