Jashari: Jemi të gatshëm si shtet por edhe si shoqëri që t’i dalim zot vendit tonë
Ish-kryetari i Skenderajt, Bekim Jashari e ka komentuar situatën në veriun e Mitrovicës. Jashari ka shkruar se Republika e Kosovës si shtet i pavarur, është ndërtuar mbi parimet demokratike që sigurojnë liri dhe të drejta të plota për secilin qytetar të saj, pa dallim.
Tutje ai është shprehur se veprimet e policisë së shtetit nuk duhet të shikohen e gjykohen ndryshe pos si zbatim i detyrave të përcaktuara nga kushtetuta jonë e të njohura edhe me konventa ndërkombëtare.
“Shtrirja e sovranitetit shtetëror në çdo cep të territorit është obligim që duhet realizuar medoemos. Si shtet i ri, nga negociatat e shumta që kemi pasur kemi bërë kompromise të dhimbshme në emër të ruajtjes së paqes, stabilitetit rajonal dhe miqësisë nderkombëtare. Me të drejtat që ua kemi garantuar me kushtetutë komuniteteve pakicë, kemi dhënë shembull në Evropë dhe botë sa i përket respektimit të lirive dhe të drejtave në shkollim, punësim, pjesëmarrje në qeverisje etj”, ka shkruar ai.
Jashari është shprehur se Kosova nuk mund të kërcënohet nga Serbia.
“Shtetin tonë nuk mund të kërcenojë dhe as cenojë askush nga Serbia, ne jemi të gatshëm si shtet por edhe si shoqëri që t’i dalim zot vendit tonë, në jetësim të amanetit të heronjve, dëshmorëve e martirëve të lirisë. Në gjithë këtë rrugë, jetike mbetet unifikimi i spektrit politik në vend për të përmbyllur këtë kapitull, në koordinim të plotë me SHBA-të dhe shtetet e Evropës e botës demokratike. Krenar me Policinë tonë që pavarësisht rrethanave qendrojnë në shërbim të shtetit dhe sigurisë së qytetarëve të Kosovës”, ka shkruar ai.
Njëkohësisht Evropa dhe mekanizmat tjerë nderkombëtar duhet të shohin politikën destruktive të Beogradit dhe të merren seriozisht me kërcënimet e Serbisë dhe atyre që ende jetojnë me iluzione e propaganda të Millosheviqit të cilat rrezikojnë stabilitetin e ballkanit dhe me gjerë. Barrikadat në veri duhet të largohen menjëherë, qytetarët atje nuk duhet të vazhdojnë të mbahen peng nga politika e Beogradit.
