Intervistë | Pajaziti: Kurti s`me ka uruar, parat e Kosovës për Luginën u keqpërdoren nga njerëzit e kryeministrit

Kryeministri Albin Kurti vazhdon inatin me përfaqësuesit e shqiptarëve të Luginës, të cilën e kundërshtojnë. Shefi i ekzekutivit ende nuk e ka uruar kryetarin e ri të Bujanocit, Arbër Pajaziti. Ndërsa, kryetaren e Preshevës, Ardita Sinan, të cilën e ka përkrahur, e ka pritur edhe në zyre.

Kandidati i Frontit për Ndryshim për kryetar të Bujanocit, Arbër Pajaziti, është shprehur optimist se të enjën të konfirmohet përfundimisht fitorja e tij.

Ai e ka kritikuar Qeverinë e Kosovës për ndërhyrje në zgjedhjet lokale në Luginë të Preshevës, duke përkrahur vetëm kandidatët e Partisë për Veprim Demokratik.

Në këtë intervistë dhënë gazetës Nacionale, Pajaziti ka thënë se të preferuarit e Kurtit në kwto zgjedhje kanë garuan nga pozicionet e tyre zyrtare që kanë në Qeverinë e Kosovës.

Ai ka treguar se kryeministri Kurti ende nuk e ka telefonuar për të uruar për fitoren.

Megjithatë, Pajaziti ka paralajmëruar se do të kërkojë takim me Kurtin, pasi ta marrë zyrtarisht postin e kryetarit të Bujanocit.

Pajaziti ka kritikuar edhe kundërkandidatin e tij, Ragmi Mustafi, i cili është përkrahur nga Qeveria e Kosovës. Sipas ti, Mustafi ka keqmenaxhuar Fondin e Kosovës për Luginë të Preshevës.

Nacionale: Z. Pajaziti, në zgjedhjet e fundit ju fituat besimin e qytetarëve te Bujanovcit. Çka bëri që ju të fitoni?
Pajaziti: Qytetarët më 2 qershor vulosën vullnetin e tyre për ndryshim. Nga viti 2002 kur shqiptarët në Komunën e Bujanocit, e fituan pushtetin lokal, dhe deri më sot, ky pushtet është udhëhequr vetëm nga dy individë: nga Nagip Arifi dhe Shaip Kamberi. Kjo nënkupton që tri grupacionet e tjera politike që ishin në garë, kanë qenë në pushtet për 22 vjet. Ato nuk e patën më besimin e qytetarëve, për shkak të keqpërdorimeve të shumta, keqmenaxhimit dhe pushtetit të cilin e përdornin për interesa partiake e grupore. Fitorja jonë ishte e pritur, por jo edhe në këtë masë.

Nacionale: Ju fituat ndonëse kundërkandidati i juaj u përkrah nga Qeveria e Kosovës. A ishte fer kjo garë, ku njëri kandidat të përkrahet nga Qeveria e Kosovës, ndërsa tjetri jo?
Pajaziti: Kundërkandidati im që u përkrah direkt nga Qeveria e Kosovës, ishte pjesë e Qeverisë së Kosovës. Ai nuk dorëzoi mandatin e këshilltarit politik të zëvendëskryeministrit të Kosovës, dhe nga ai pozicion deshi të kandidojë për kryetar komune. Përveç kësaj, qytetarët ishin të njoftuar se kandidati të cilin në këtë rast e përkrahi Qeveria e Kosovës, ishte po ai i njëjti që keqmenaxhoi me Fondin e Kosovës të dedikuar për qytetarët e Luginës së Preshevës. Nëse dëshironi ta dini se si është keqmenaxhuar fondi, lehtë me një hulumtim mund t'i siguroni të dhënat. Njerëzit që ishin shokë të Ragmiut, njerëz edhe partiak, edhe prej tyre që ishin në listë për këshilltarë nga partia e Ragmiut, PVD, morën fonde të majme nga Fondi i Kosovës, dhe nuk kanë asnjë aktivitet në Luginës. Tjetra është se, Ragmiu ka deklaruar në Kosovë pasuri rreth 770 mijë euro, rreth 200 mijë më shumë se kryeministri Albin Kurti. Për të gjitha këto qytetarët ishin të njoftuar, dhe si përfundim i dhanë votë aq sa e meritoi.

Nacionale: Gjithashtu, në Preshevë u përkrah vetëm njëri kandidat nga Qeveria e Kosovës. Si e keni parë këtë ndërhyrje të Kosovës në këto zgjedhje?
Pajaziti: Mendoj, që atje përkrahja e Kurtit si kryeministër ka patur më shumë ndikim, për shkak se kandidatja Ardita Sinani ishte në opozitë, dhe kjo i jepte asaj edhe një mundësi tjetër për të pasur këtë rezultat që ka sot.

Nacionale: A keni marrë ndonjë urim nga kryeministri Kurti apo dikush nga Qeveria e Kosovës për fitoren tuaj?
Pajaziti: Jo, nuk kam marr.

Nacionale: Dje e kemi parë që kryeministri Kurti e ka takuar kryetaren e Preshevës, znj. Ardita Sinani, të cilën e ka edhe këshilltare. Ju a keni marrë ndonjë ftesë për takim nga kryeministri i Kosovës?
Pajaziti: Akoma nuk kam marr. Kjo përsëri vërteton se kryeministri i fton në takim përfaqësuesit e Luginës, dhe nuk është veç ashtu siç thotë, që shkon ku e thërrasin.
Nacionale: Pas fitores keni thënë që ndër veprimet e para që do t'i bëni do të jetë kërkesa për një takim me Kurtin. E kemi bërë një gjë të tillë?
Pajaziti: Patjetër që do ta bëj një hap të tillë. Mirëpo, të enjten, më 13 qershor do të rivotohet në dy vendvotime. Sapo të marr pozitën e kryetarit, do ta dërgojë kërkesën për takim. Është shumë më e rëndësishme ta bëj këtë në cilësinë e kryetarit.

Nacionale: Cili janë kërkesat tuaja ndaj Qeverisë së Kosovës?
Pajaziti: Ne do të punojmë që të kemi më shumë mbështetje nga Kosova. Do të ndërlidhun komunat që të jemi partnerë në organizime. Ashtu do të ndodh edhe me Bashkitë në Shqipëri.