“Asociacion Plus”: LDK e ashpër kundër Kurtit dhe e befasuar pas marrëveshjes së Ohrit
Lidhja Demokratike e Kosovës (LDK) e ka kundërshtuar me një ashpërsi të madhe pranimin që i ka bërë kryeministri Kurti Aneksit të Zbatimit të Propozimit Evropian. Çka po thonë nga kjo parti politike?
I pari që foli ishte edhe i pari i kësaj partie, Lumir Abdixhiku. 24 pas mesnate, ai do të shkruante se marrëveshja në fjalë ishte “mashtrim dhe humbje e një mundësie historike”.
“Një marrëveshje pa njohje, jofinale dhe me Asociacion Plus në të është çfarë Kurti i solli Kosovës sot.” – komentoi lideri i LDK-së.
Paraprakisht, kryeministri i vendit e kishte pranuar se Propozimi nuk e përmbante njohjen de jure por kishte insistuar se megjithatë e kishte “njohjen de fakto” që po shihet gjerësisht si një tjetër mashtrim i tij.
“Asociacionin Plus” e përmendi edhe Jehona Lushaku Sadriu nga kjo parti politike.
Ajo konsideroi se Kurti me VV-në i kishin bërë “koncesionet më të mëdha ndonjëherë.”
“Arritën një marrëveshje që siguron nivel të ri vetëmenaxhimi të komunitetit serb – Asociacion Plus! Pa njohje, por me tejkalim të së kaluarës e status të kishës serbe.” – argumentoi ajo.
I aderuari i fundit në këtë parti, Berat Rukiqi, ka denoncuar argumentimin e VV-së se presidenti serb Vuçiq nuk e ka nënshkruar marrëveshjen. “Me gjasë, nuk paskan arritur mjaftueshëm të lexojnë dhe të kuptojnë që marrëveshjet mund të pranohen dhe zbatohen edhe pa qenë të nënshkruara.” – u shpreh ai.
Në fakt, këtë argument e ka përdorur edhe kryeministri Kurti duke thënë se po të ishte marrëveshja e mirë për Serbinë, Vuçiqi do ta nënshkruante. Vetëm Armend Muja nga VV duket se po e kupton një gjë të tillë, pasi me anë të një statusi e pranoi se për marrëveshje ndërkombëtare nuk ishte i domosdoshëm nënshkrimi.
Vuçiq ishte tallur po ashtu sot, duke thënë se “i dhimbte dora” dhe për atë arsye nuk nënshkruante.
Kujtojmë se Partia Social-Demokrate ka paralajmëruar protestë për të shtunën e ardhshme (25 mars) kundër kësaj marrëveshjeje duke i kërkuar edhe dorëheqjen kryeministrit Albin Kurti.
