Edhe gjashtë të vrarë në personelin ushtarak iranian nga sulmet amerikane, numri shkon në 13

Agjencia gjysmëzyrtare iraniane e lajmeve, “Tasnim” raportoi të enjten për vdekjen e gjashtë pjesëtarëve të tjerë të personelit ushtarak nga sulmet amerikane këtë javë, duke e çuar numrin e përgjithshëm në të paktën 13.

Sulmet e forcave amerikane të martën ishin më të gjerat në disa javë. Në raportin më të ri për vdekjet në personelin ushtarak, agjencia “Tasnim” tha se gjashtë pjesëtarë të ushtrisë së rregullt, përfshirë tre pilotë, janë vrarë në jug të Iranit, pa dhënë më shumë hollësi për vendin, transmeton agjencia e lajmeve “Reuters”.

Agjencia “Tasnim” kishte raportuar më herët se nga sulmet e së martës ishin vrarë tre anëtarë të grupit paramilitar Basij në Ishullin Lavan, në Gjirin Persik, ndërsa funeralet e tyre u mbajtën të mërkurën në jug të vendit.

Nga këto sulme u vranë edhe katër pjesëtarë të Forcës Aerohapësinore të Gardës Revolucionare në pjesën perëndimore të Iranit, sipas një deklarate të kësaj force, e publikuar të mërkurën.

Viktimat ushtarake iraniane në konfliktin që filloi në fund të shkurtit janë raportuar kohë pas kohe, pa konfirmim zyrtar për numrin e përgjithshëm të të vrarëve.

Lufta, e cila filloi me sulmet amerikano-izraelite kundër Iranit, ka lënë mijëra të vrarë, shumica dërrmuese në Iran dhe Liban.

Të mërkurën, një zyrtar i Ministrisë së Shëndetësisë në Iran tha në rrjetin X se nga 30 gushti deri më 2 shtator, 18 njerëz janë vrarë, përfshirë katër që po merrnin pjesë në një dasmë, dhe 142 të tjerë janë plagosur, duke e risjellë vëmendjen te numri i viktimave civile.

Agjencia “Tasnim” gjithashtu raportoi se nga sulmet e forcave amerikane në jug të Iranit të dielën u vranë tre njerëz. Një medium iranian identifikoi dy prej tyre si pjesëtarë të forcës detare të Rojës Revolucionare.