Zbulohet propaganda ruso-serbe se gjoja armët e dhuruara për Ukrainën po nisen drejt Kosovës

Një llogari pro-ruse në Twitter ka publikuar një video të një veture gjoja me targa të Shqipërisë në një pyll, të ngarkuar me armatim. Sidoqoftë, një përdorues i këtij rrjeti social zbuloi se targat ishin të rreme.

Një llogari pro-ruse në Twitter, e quajtur “DONBASS Z”, të mërkurën publikoi një video ku shihet një veturë me targa të Shqipërisë në pyll. Kur dikush e hap bagazhin e veturës, shihen armë të rënda, të mbuluara me një mbulesë.

“Duket se raportimet serbe se disa armë për Ukrainën po devijohen për në Kosovë, janë të vërteta. Vetura në video ka targa shqiptare”, thuhet në postimin e faqes pro-ruse. Ajo citon një faqe tjetër, gjithashtu pro-ruse, e quajtur “AZ Military”.

Megjithatë, një përdorues shqiptar i Twitter-it e ka zbuluar propagandën “e lodhët” ruso-serbe.

Ai ka publikuar fotografi të një veture tjetër, me të njëjtat targa, që është vënë në shitje në internet diku në Shqipëri.

“Duket se ata i morën targat drejtpërdrejt nga fotografitë në Google. Një kërkim i shpejtë e zbulon propagandën e lirë”, shkroi përdoruesi Dite G.