Raportohet se një 10-vjeçare në Gaza u vra derisa po hante ushqim - NACIONALE
NACIONALE

Raportohet se një 10-vjeçare në Gaza u vra derisa po hante ushqim

1 orë më parë

nga NACIONALE

Sulmet ajrore dhe zjarri i armëve të forcave izraelite lanë të vrarë dy fëmijë dhe të paktën dy palestinezë të tjerë në Rripin e Gazës të hënën, thanë zyrtarët shëndetësorë në këtë enklavë.

Mjekët dhe të afërmit thanë se 10-vjeçarja Amal Abu Khater u godit nga një plumb në shpinë, përderisa ishte duke ngrënë brenda tendës së familjes së saj në qytetin jugor të Gazës, Khan Younis. Ata shtuan se zjarri i armëve erdhi nga forcat izraelite në lindje, raporton agjencia e lajmeve “Reuters”.

Ushtria izraelite tha se nuk ishte e vetëdijshme për ndonjë incident që përfshin një vajzë 10-vjeçare.

Një djalë 4-vjeçar dhe një palestinez tjetër u vranë nga sulmet ajrore izraelite ndaj një shtëpie në kampin e refugjatëve “Bureij” dhe një rruge në Khan Younis, thanë mjekët.

Më herët të hënën, një sulm tjetër ajror izraelit la të vrarë një person dhe një tjetër u plagos në një tendë në Deir Al-Balah, në pjesën qendrore të Rripit të Gazës, thanë mjekët.

Ushtria izraelite tha se në shënjestër të sulmit në Deir Al-Balah ishte një militant i Hamasit, por nuk iu përgjigj në mënyrë specifike pyetjeve për dy sulmet e tjera të raportuara në Khan Younis dhe Bureij.

Më shumë se 1.280 palestinezë janë vrarë në Gaza që nga hyrja në fuqi e armëpushimit në tetor, sipas zyrtarëve shëndetësorë në Gaza, ndërsa ushtria izraelite thotë se katër ushtarë të saj janë vrarë gjatë periudhës së njëjtë.

Paralajmërim: Pamje të ndjeshme!

Tjera:

Lajme të ngjashme