“Veprat dhe emri i tij jehojnë gjithandej”: Kurti shpreh ngushëllime për vdekjen e skulptorit Luan Mulliqi

Në rastin e shuarjes nga jeta të skulptorit të madh kosovar, Luan Mulliqi, Kryeministr i Kosovës, Albin Kurti, ka shprehur ngushëllimet ndaj familjarëve, miqëve, kolegëve dhe studentëve të tij.

Ngushëllimi i Kurtit:

Shkrimtarit më të madh shqiptar, Ismail Kadaresë, iu kishte ngulitur aq thellë në mendje një skulpturë e Nënës Terezë sa edhe pati shkruar: “Nënë Tereza e Mulliqit ka një metaforë të rrallë që duke shpërthyer nga toka dëshmon për vërtetësinë e shenjtores sonë.”

Luan Mulliqi ka ndërruar jetë.

Si veprat, edhe emri i tij, jehon gjithandej. Pafund janë vendet në të cilat ka ekspozuar e ku veprat e tij janë të koleksionuara, njësoj sikur pafund janë punët që la pas. Një artist me shije të hollë e me dije të gjerë nga sot nuk është më në mesin tonë. Mungesën do t'ia ndjejmë përherë më shumë, por, Luanin do ta shohim në qytet nëpërmjet punës së tij. Artisti nuk shuhet, sepse vepra e tij jeton.

Ngushëllime familjes, miqëve, kolegëve e studentëve të tij! Ngushëllime të gjithë neve!