Vdes një person në Mazgit, u godit nga vetura
Një aksident trafiku ka ndodhur sot në rrugën Prishtinë-Mitrovicë, më konkretisht në fshatin Mazgit, ku një veturë ka përplasur një këmbësor i cili ka humbur jetën.
Zëdhënësi i Policisë për rajonin e Prishtinës, Agron Borovci ka bërë të ditur se aksidenti ka ndodhur rreth orës 17:00.
“Rreth orës 17:00, është pranuar informata për një aksident trafiku rrugor të ndodhur në rrugën magjistrale Prishtinë-Mitrovicë, respektivisht në fshatin Mazgit, me ç'rast një veturë ka përplasur një këmbësor. Si pasojë e aksidentit këmbësori ka humbur jetën”, ka thënë ai.
Borovci tutje ka bërë të ditur se njësitet e trafikut kanë dalë në vendin e ngjarje dhe kanë ndërmarrë veprimet e nevojshme për hetimin e rastit.
“Njësia rajonale e trafikut ka dalë në vendin e ngjarjes dhe po ndërmerr veprimet e nevojshme për ndriçimin e shkaqeve që kanë sjellë deri te aksidenti”, ka bërë të ditur Borovci për Nacionalen.
