Osmani pret në takim ministren Xhaçka: Bashkëpunimi dhe koordinimi me Shqipërinë është prioritet i yni
Presidentja e Kosovës, Vjosa Osmani ka pritur në takim ministren e Punëve të Jashtme të Shqipërisë, Olta Xhaçka.
Gjatë këtij takimi, Osmani ka thënë se bashkëpunimi dhe koordinimi me Shqipërinë është prioritet i tyre.
“Bashkëpunimi dhe koordinimi me Shqipërinë është prioritet i yni. Prandaj sot, në një takim përmbajtësor me ministren për Evropën dhe Punët e Jashtme të Shqipërisë, Olta Xhaçka, diskutuam rëndësinë e forcimit të mëtejmë të bashkëpunimit ndërmjet dy vendeve tona, mbështetjes së ndërsjellë, si dhe përgjigjes së përbashkët ndaj sfidave aktuale të sigurisë”, ka shkruar Osmani.
Ministrja e Shqipërisë, Xhaçka, është duke qëndruar sot në Prishtinë, ku është takuar edhe me homologen e saj në Kosovë, Donika Gërvalla, me të cilën kanë mbajtur edhe një konferencë për media.
Xhaçka gjatë konferencës ka përmendur liberalizimin e vizave për Kosovën.
“E kam fjalën për çështjen e vizave e cila duket se ka hyrë në rrugën e zgjidhjes. Izolimi që i është bërë Kosovës është i pakuptimtë dhe nuk ka kuptim për ta mbajtur këtë situatë pezull. Dua ta garantojë motrën time që Shqipëria do të bëjë gjithçka për ta mbrojtur Kosovën”, tha tutje Xhaçka.
