Mbi 250 mijë persona largohen nga zjarret në Francë dhe Spanjë
Mbi 250 mijë persona janë detyruar të largohen nga shtëpitë e tyre për shkak të zjarreve të pakontrolluara në Francë dhe Spanjë, ndërsa qindra zjarrfikës vijojnë përpjekjet për të ndalur përhapjen e flakëve, raporton The Guardian.
Autoritetet spanjolle kanë evakuuar rreth 70 mijë banorë nga zonat qendrore të vendit, ndërsa në Francë janë zhvendosur 197 mijë persona, përfshirë dhjetëra mijëra banorë të Bordosë dhe rrethinave të saj.
Spanja ka shpallur emergjencë kombëtare, për herë të parë për shkak të zjarreve pyjore. Ministri francez i Brendshëm tha se evakuimet mund të jenë më të mëdhatë të kryera ndonjëherë në vend gjatë kohës së paqes.
Erërat e forta dhe temperaturat e larta kanë përkeqësuar situatën. Në Spanjë, dy nga tri vatrat kryesore u bashkuan të premten, duke e bërë më të vështirë ndërhyrjen e ekipeve të emergjencës.
Në rajonin Gironde të Francës, qeveria ka angazhuar 1,500 ushtarë dhe 19 avionë, përfshirë një Airbus A400M Atlas. Autoritetet kanë shpërndarë gjithashtu 1.5 milion maska për mbrojtjen nga tymi. Ekipet po hapin kanale mbrojtëse dhe po përdorin lëndë ngadalësuese për të frenuar përparimin e flakëve.
Zjarret ndodheshin rreth 32 kilometra në perëndim të Bordosë, ndërsa policia po evakuonte banorët derë më derë. Qielli i mbuluar nga tymi ka shkaktuar panik dhe paralajmërime shëndetësore edhe në Madrid.
