Fondacioni Bill dhe Melinda Gates po jep 1.2 miliardë dollarë për poliomielitin

Fondacioni Bill dhe Melinda Gates tha të dielën se do të angazhojë 1.2 miliardë dollarë për të çrrënjosur poliomielitin në nivel global.

Polio është një sëmundje shumë ngjitëse që përhapet kryesisht përmes jashtëqitjes ose pështymës dhe vret dhe paralizon mijëra fëmijë çdo vit. Edhe pse nuk ka një kurë të njohur për këtë sëmundje, tre injeksione të vaksinës ofrojnë pothuajse 100% imunitet.

Qeveritë dhe fondacionet planifikojnë të zhdukin poliomielitin në Pakistan dhe Afganistan, dy vendet e fundit ku virusi ende qarkullon.

"Hapat e fundit të çrrënjosjes janë shumë më të vështirat. Por fondacioni ynë mbetet i përkushtuar ndaj një të ardhmeje pa poliomielit dhe ne jemi optimistë se do ta shohim atë të ardhme së shpejti," tha Mark Suzman, president i Fondacionit Bill & Melinda Gates, i cili udhëhiqet nga bashkëthemeluesi i Microsoft Bill Gates dhe ish-gruaja e tij Melinda French Gates.

Më shumë vende janë në rrezik të rishfaqjes së kësaj sëmundjeje

Muajin e kaluar, Organizata Shëndetësore Panamerikane (PAHO) tha se Brazili, Republika Domenikane, Haiti dhe Peruja ishin në rrezik të lartë të rishfaqjes së poliomielitit. Shteti amerikan i Nju Jorkut po shton përpjekjet për të vaksinuar banorët pasi virusi u zbulua në mostrat e ujërave të zeza. Raste janë raportuar edhe në Londër dhe Jerusalem.

Në mars, një zyrtar i lartë i Organizatës Botërore të Shëndetësisë tha se bota ishte në një "moment të rrezikshëm" në luftën kundër sëmundjeve të tilla si polio, pas një shpërthimi në Malavi. Dita botërore e poliomielitit festohet çdo vit më 24 tetor për të tërhequr vëmendjen ndaj kësaj sëmundje jashtëzakonisht të rrezikshme. /Nacionale/