Vrau gjashtë klientë dhe veten në SHBA - Biden: Duhet të ndërmarrim hapa më vendimtarë

Një punonjës i një supermarketi Walmart në qytetin Chesapeake, Virxhinia, vrau gjashtë persona, plagosi disa të tjerë dhe më pas kreu vetëvrasje, njoftuan sot autoritetet lokale. Sulmuesi, identiteti i të cilit nuk bëhet i ditur, ka qëlluar mbi klientët në dyqan të martën vonë në mbrëmje.

Përveç gjashtë të vrarëve, të paktën katër të tjerë u plagosën, tha shefi i policisë së Chesapeake Mark Solesky në një konferencë shtypi.

Pasi pesë persona u qëlluan për vdekje në një klub nate LGBTQ në Kolorado Springs të shtunën, është masakra e fundit që ka ngjallur debate të dënimit të zyrtarëve publikë dhe ka nxitur aktivistët të bëjnë thirrje për kontroll më të rreptë të armëve në SHBA.

Biden: Ne duhet të ndërmarrim hapa më të mëdhenj, më vendimtarë

Presidenti amerikan Joe Biden foli të mërkurën me keqardhje për vrasjen dhe të shtënat masive më të fundit në vend dhe bëri thirrje për reformë të ligjit për armët.

“Për shkak të një akti tjetër dhune të tmerrshme dhe të pakuptimtë, tani ka disa tavolina bosh në vendin tonë këtë Ditë Falënderimesh”, tha Shtëpia e Bardhë në një deklaratë. “Duhet të bashkohemi si komb... Duhet të hedhim hapa më të mëdhenj, më vendimtarë”.

Disa vite më parë, 23 njerëz u vranë në Walmart

Një punonjës i Walmart tha për ABC News se vrasësi ishte një menaxher dyqani.

“Kam ngritur sytë teksa menaxheri im hapi derën dhe më pas hapi zjarr ndaj njerëzve në dyqan”, tha Briana Tyler për ABC.

Ky nuk është sulmi i parë masiv në Walmart. Në gusht 2019, 23 persona u vranë në dyqanin e të njëjtit zinxhir të shitjes me pakicë në El Paso, Teksas, në një sulm që policia e quajti një akt terrorizmi të brendshëm. /Nacionale/