Vetura e mbushur me eksploziv e godet xhaminë në Pakistan, së paku 17 të vrarë
Të paktën 17 njerëz kanë vdekur dhe 73 të tjerë janë plagosur, pasi një automjet i mbushur me lëndë shpërthyese u përplas në një xhami në veriperëndim të Pakistanit, sipas agjencisë së lajmeve të këtij shteti.
Shtatë policë dhe një fëmijë 4-vjeçar janë në mesin e të vrarëve në sulmin që gjithashtu përfshiu persona të armatosur që hapën zjarr brenda një objekti të policisë në qytetin Kohat, raportoi “Associated Press of Pakistan”, transmeton televizioni BBC.
Presidenti i Pakistanit, Asif Ali Zardari, përmes një deklarate ua shprehu “urimet më të mira për shërim të shpejtë të lënduarve në shpërthim”.
Raportohet se shpërthimi ndodhi rreth orës 13:15 sipas kohës lokale, kur po bëheshin lutjet e së premtes.
Një zëdhënës i policisë tha se shtatë militantë të armatosur u përpoqën që të depërtonin në objektin e policisë pas shpërthimit.
Asnjë grup nuk e mori menjëherë përgjegjësinë për sulmin.
Kryeministri i Pakistanit, Shehbaz Sharif, e dënoi shpërthimin.
Aktivitetet e militantëve në zonat kufitare të vendit janë shtuar dukshëm muajve të fundit. Grupet e armatosura po i vënë në shënjestër ushtrinë dhe policinë.
