Ukraina thotë ka goditur dy fabrika ruse të aeroplanëve në Ulyanovsk dhe Novgorod
Ushtria ukrainase goditi dy fabrika ruse që prodhojnë dhe riparonin aeroplanë transportues ushtarak dhe aeroplanë mallrash në rajonet Ulyanovsk dhe Novgorod, tha të mërkurën Shtabi i Përgjithshëm i Ukrainës.
Në një deklaratë, Shtabi i Përgjithshëm tha se sulmi ndaj fabrikës “Aviastar”, pjesë e Korporatës së Bashkuar të Aeroplanëve të Rusisë, në qytetin Ulyanovsk, u krye më 16 mars, raporton agjencia e lajmeve “Reuters”.
Në këtë fabrikë prodhohen aeroplanë transportues ushtarakë të tipit “Ilyushin-76MD-90A”, aeroplanë për rimbushje të tipit “Ilyushin-78M-90A” dhe ofrohet mirëmbajtje për aeroplanët e mallrave të tipit “Ruslan”. Fabrika ndodhet rreth 800 kilometra larg kufirit me Ukrainën.
Ushtria ukrainase tha se i goditi hangarët dhe zonat e parkingut dhe se disa prej aeroplanëve u dëmtuan.
Sulmi ndaj fabrikës së 123-të për mirëmbajtjen e aeroplanëve në qytetin Staraya Russia në rajonin e Novgorodit ndodhi një ditë më pas, tha Shtabi i Përgjithshëm i Ukrainës.
Në një shkrim të publikuar në rrjetin “Telegram”, Shtabi i Përgjithshëm tha se kjo qendër ofronte cikël të plotë të riparimeve dhe modernizimit për aeroplanët e rëndë transportues, përfshirë ata të tipave “Ilyushin-76”, “Ilyushin-78” dhe “L-410”.
Ushtria ukrainase tha se është goditur një hangar që përdorej për servisimin e aeroplanëve transportues “Ilyushin-76” dhe “L-410”. Agjencia “Reuters” nuk arriti që ta vërtetonte raportin në mënyrë të pavarur.
“Goditja e caqeve të tilla drejtpërdrejt e zvogëlon aftësinë e armikut për t’i rikthyer dhe mbajtur aeroplanët që janë të gatshëm për luftime” – thanë në rrjetin X forcat ukrainase të dronëve./Nacionale
