Të paktën katër të vrarë nga të shtënat në një spital në Oklahoma
Të paktën katër persona u vranë të mërkurën gjatë të shtënave në zonën e një spitali në Oklahoma të ShBA-së, tha policia amerikane në një konferencë për gazetarë.
Policia tha se edhe sulmuesi është i vdekur. Autoritetet besojnë se ai e ka mbytur veten.
Zyrtari policor, Richard Meulenberg, tha se disa persona janë plagosur, ndonëse asnjëri prej tyre nuk është në rrezik për jetë.
Me të arritur në vendin e ngjarjes, policia dëgjoi të shtëna brenda ndërtesës. Raportohet se të shtënat kanë ndodhur në katin e dytë të saj. Asnjë polic nuk është lënduar gjatë operacionit.
Muelenberg tha se sulmuesi kishte një armë të gjatë në vendin e ngjarjes. Emri i sulmuesit nuk është bërë publik.
Autoritetet gjithashtu nuk kanë dhënë informata për motivimin e mundshëm për këtë sulm.
Zyrtarët janë duke i intervistuar dëshmitarët që ndodheshin në pjesë të ndryshme të ndërtesës, përfshirë ata të katit të dytë, ku ndodhi sulmi.
Shtëpia e Bardhë tha se presidenti Joe Biden është njoftuar për rastin. Javën e kaluar, ai u bëri thirrje amerikanëve që zëri i tyre të dëgjohej për ta parandaluar dhunën e mëtejme me armë, pas vrasjes së 19 fëmijëve dhe dy mësuesve në një shkollë në Teksas.
