Sulmuesi i Salman Rushdie i habitur që autori ka mbijetuar, lavdëron Ayatollahin e Iranit
Burri nga Nju Xhersi, i cili dyshohet se goditi me thikë Salman Rushdie në Nju Jorkun perëndimor javën e kaluar, në një intervistë ekskluzive nga burgu për New York Post, ka lavdëruar Ayatollah Khomein-in e Iranit, duke pranuar se është i befasuar që shkrimtari i ka mbijetuar sulmit.
"Kur dëgjova se ai mbijetoi, u habita," tha Hadi Matar, në një intervistë video nga burgu i qarkut Chautauqua.
24-vjeçari i pyetur nëse ishte frymëzuar nga lideri suprem i ndjerë iranian, Ayatollah Ruhollah Khomeini, i cili lëshoi një fetva, ose dekret, duke bërë thirrje për vdekjen e Rushdie në vitin 1989 për shkak të librit të autorit "Vargjet Satanike", u shpreh duke thënë se:
“Unë e respektoj Ajetullahun. Unë mendoj se ai është një person i madh. Kjo është aq sa unë do të them për këtë," tha Matar, duke vënë në dukje se ai ka lexuar vetëm dy faqe të romanit të Rushdie.
Sulmuesi i akuzuar për sulmin me thikë ka mohuar se ishte në kontakt me Gardën Revolucionare të Iranit dhe aludoi se kishte vepruar plotësisht i vetëm.
Ai tha se ishte i frymëzuar të shkonte në Chautauqua pasi ka parë diku në Twitter një postim që njoftonte për vizitën e Rushdie.
“Nuk më pëlqen personi. Unë nuk mendoj se ai është një person shumë i mirë," tha ai për Rushdie, duke shtuar se “ai është dikush që sulmoi Islamin, ai sulmoi besimet e tyre, sistemet e besimit.”
Shkrimtari 75-vjeçar me origjinë nga India, i cili është përballur me kërcënime me vdekje për dekada të tëra për romanin për të cilin disa muslimanë besojnë se fyente Profetin Muhamed, u sulmua në skenë të premten teksa po përgatitej të mbante një leksion mbi lirinë artistike në Institutin Chautauqua.
Rushdie – i cili më parë kaloi vite të tëra duke u fshehur për shkak të shpërblimit iranian prej 3 milionë dollarësh për kokën e tij – u godit me thikë të paktën 10 herë, duke pësuar lëndime të shumta. Por, sipas agjentit të tij letrar Andrew Wylie, që nga sulmi Rushdie është në “rrugë drejt shërimit”.
