Sulm ndaj një autobusi të shkollës, së paku pesë të vrarë në Pakistan
Një sulm me bombë ndaj një autobusi të shkollës në rajonin Baloçistan të Pakistanit la të vrarë të paktën pesë njerëz dhe dhjetëra të tjerë u lënduan.
Me autobus po udhëtonin rreth 40 nxënës, kur automjeti shpërtheu rreth orës 7 e 40 minuta të mëngjesit sipas kohës lokale afër qytezës Khuzdar, i tha policia televizionit BBC.
Tre prej pesë të vdekurve janë fëmijë, tha policia. Në pamje që po qarkullojnë në internet shihet autobusi i djegur e disa çanta shkolle të shpërndara përreth tij.
Asnjë grup deri më tani nuk e ka marrë përgjegjësinë për incidentin, por Baloçistani, provincë me trazira në jugperëndim të vnedit, për një kohë të gjatë është goditur nga një kryengritje dhe shkelja e të drejtave të njeriut.
Ministri i Punëve të Brendshme, Mohsin Naqvi, e dënoi incidentin duke e quajtur “barbarizëm të pastër”, ndërsa sulmuesit “bishta që shënjestrojnë fëmijë” në përpjekje për ta destabilizuar vendin.
Ushtria pakistaneze i ka akuzuar Indinë dhe grupet prokura të saj në Baloçistan për orkestrimin e shpërthimit, edhe pse nuk ka dëshmi për një gjë të tillë.
Pakistani dhe India porsa kanë dalë nga një konflikt vdekjeprurës dyjavor, i nxitur nga një sulm i militantëve ndaj turistëve në pjesën e Kashmirit që administrohet nga India./Nacionale
