Sherri i një reklame: Trump thotë se të gjitha bisedimet tregtare me Kanadanë janë “pezulluar”
Donald Trump ka deklaruar se po i jep fund “të gjitha negociatave tregtare” me Kanadanë pas publikimit të një reklame televizive që kundërshtonte tarifat amerikane. Presidenti amerikan akuzoi Kanadanë për “sjellje të papranueshme” me qëllim ndikimin e vendimeve të gjykatave amerikane, shkruanThe Guardian.
Postimi i Trump në rrjetin e tij social të enjten në mbrëmje erdhi pasi kryeministri kanadez, Mark Carney, tha se synon të dyfishojë eksportet e vendit të tij drejt shteteve jashtë SHBA-së, për shkak të kërcënimit që paraqesin tarifat e Trump-it.
Trump shkroi: “Fondacioni Ronald Reagan sapo ka njoftuar se Kanadaja ka përdorur në mënyrë të rreme një reklamë të falsifikuar, ku shfaqet Ronald Reagan duke folur negativisht për tarifat.”
Presidenti shtoi: “Ata e bënë këtë vetëm për të ndikuar në vendimin e Gjykatës së Lartë të SHBA-së dhe të gjykatave të tjera.” Ai vijoi: “Tarifat janë shumë të rëndësishme për sigurinë kombëtare dhe ekonominë e SHBA-së. Bazuar në sjelljen e tyre të papranueshme, të gjitha negociatat tregtare me Kanadanë pezullohen menjëherë.”
Më herët të enjten, Fondacioni dhe Instituti Presidencial Ronald Reagan postoi në X se reklama e krijuar nga qeveria e Ontarios “e shtrembëron fjalimin presidencial radiofonik drejtuar kombit për tregtinë e lirë dhe të ndershme”, të datës 25 prill 1987. Fondacioni shtoi se Ontario nuk kishte marrë leje “për përdorimin dhe redaktimin e deklaratave”.
Fondacioni tha se po “shqyrton opsionet ligjore për këtë çështje” dhe ftoi publikun të shikojë videon origjinale të paprera të fjalimit të Reagan-it.
Carney u takua me Trump në fillim të këtij muaji për të zbutur tensionet tregtare, ndërsa të dy vendet dhe Meksika po përgatiten për një rishikim të Marrëveshjes SHBA-Meksikë-Kanada (USMCA) — një marrëveshje tregtare që Trump e negocioi gjatë mandatit të tij të parë, por për të cilën tani është bërë kritik.
Më shumë se tre të katërtat e eksporteve kanadeze shkojnë në SHBA, dhe pothuajse 3.6 miliardë dollarë kanadezë (rreth 2.7 miliardë dollarë amerikanë) mallra dhe shërbime kalojnë kufirin çdo ditë.
Në një postim të vetin në X javën e kaluar, Doug Ford, kryeministri i Ontarios, shpërndau një link të reklamës dhe shkroi: “Është zyrtare: Fushata jonë e re e reklamimit në SHBA ka nisur.”
Ai shtoi: “Duke përdorur çdo mjet që kemi, nuk do të ndalojmë kurrë së mbrojturi Kanadanë kundër tarifave amerikane. Rruga drejt mirëqenies është përmes bashkëpunimit.”
