ShBA-ja ia merr Rusisë çështjen Armeni – Azerbajxhan, të dielën bisedime në Uashington
Armenia dhe Azerbajxhani do të zhvillojnë një rund të ri bisedimesh në Uashington të dielën në përpjekje për t’i normalizuar marrëdhëniet, tha të shtunën një zëdhënëse e Ministrisë së Jashtme të Armenisë.
Tensionet mes këtyre dy vendeve janë rritur përsëri për rajonin e Nagorno-Karabakut, ku paqeruajtësit rusë ishin vendosur më 2020 për t’i dhënë fund një lufte të shkurtër, e dyta që u zhvillua mes Armenisë dhe Azerbajxhanit për këtë enklavë që nga rënia e Bashkimit Sovjetik më 1991, raporton agjencia “Reuters”.
Rajoni malor njihet nga komuniteti ndërkombëtar si pjesë e territorit të Azerbajxhanit, por banohet kryesisht nga armenët etnikë.
“Nga 30 prill, ministri i Punëve të Jashtme të Armenisë, Ararat Mirzoyan, do të jetë në Uashington për një vizitë pune. Rundi i ardhshëm i diskutimeve mes Armenisë dhe Azerbajxhanit është caktuar”- shkroi në “Facebook” zëdhënësja e ministrisë armene, Ani Badalyan.
Pavarësisht përpjekjeve të gjata për të ndërmjetësuar mes tyre, Armenia dhe Azerbajxhani ende nuk kanë arritur marrëveshje të paqes, me të cilën do t’i zgjidhnin çështjet e pazgjidhura, përfshirë demarkacionin dhe kthimin e të burgosurve.
Të dielën e kaluar, Azerbajxhani vendosi një pikë të re kontrolli në rrugën për në Karabak, në atë që njihet si korridori i Lachin-it. Armenia e cilësoi këtë veprim si shkelje të rëndë të armëpushimit të vitit 2020.
