ShBA dhe Irani pritet të rinisin bisedimet në Zvicër, Libani dhe Hormuzi mbeten pengesa kryesore

Shtetet e Bashkuara dhe Irani pritet të nisnin sot raund të ri bisedimesh në Zvicër, teksa konflikti midis Izraelit dhe Hezbollahut në Liban po rrezikon përpjekjet për paqe më të gjerë dhe për mbajtjen hapur të qarkullimit detar në Ngushticën e Hormuzit, sipas The New York Times.

Zëvendëspresidenti amerikan JD Vance mbërriti herët të dielën në Zvicër për të udhëhequr ekipin negociator të Shteteve të Bashkuara. Delegacioni amerikan përfshin edhe të dërguarit e posaçëm të Presidentit Trump, Steve Witkoff dhe Jared Kushner.

Një delegacion iranian kishte mbërritur më herët. Në të bënte pjesë gjenerali Mohammad Bagher Ghalibaf, negociatori kryesor i Iranit në bisedimet e mëparshme dhe kryetar i parlamentit iranian.

Para se të nisej, Vance u tha gazetarëve se do të qëndronte në Zvicër për një ose dy ditë. Ai tha se shpresonte të arrihej përparim për “çështjen bërthamore” dhe për “çështjen e armëpushimit në Liban”. Nisja e tij ishte shtyrë që nga mbrëmja e së enjtes, duke shtuar pasigurinë mbi fatin e bisedimeve.

Esmail Baghaei, zëdhënës i Ministrisë së Jashtme të Iranit dhe pjesë e delegacionit iranian, u tha mediave shtetërore të shtunën se udhëtimi synonte të ndiqte zbatimin e zotimeve nga pala tjetër. Sipas tij, delegacioni iranian shkoi në Zvicër për të “follow up on implementation of the other side’s commitments.”

Bisedimet zhvillohen në një moment të brishtë. Luftimet midis Izraelit, aleat i Shteteve të Bashkuara, dhe Hezbollahut, grup i mbështetur nga Irani, kanë kërcënuar përpjekjet për të arritur një marrëveshje më të gjerë paqeje, sipas NYT. Një pjesë e këtyre përpjekjeve lidhet edhe me sigurimin e trafikut detar në Ngushticën e Hormuzit, një rrugë kyçe për anijet tregtare.

Statusi i ngushticës mbeti i paqartë pasi ushtria iraniane tha se e kishte mbyllur sërish për trafikun detar, ndërsa ushtria amerikane tha se anijet vazhdonin të kalonin. Irani akuzoi Shtetet e Bashkuara se nuk kishin përmbushur zotimet e tyre, duke mos frenuar armiqësitë midis Izraelit dhe Hezbollahut.

Kapiteni Tim Hawkins, zëdhënës i Komandës Qendrore të SHBA-së, tha: “Irani nuk e kontrollon Ngushticën e Hormuzit. Trafiku vazhdon të qarkullojë dhe forcat amerikane po e monitorojnë situatën për t’u siguruar që kjo të mbetet kështu.”

Pas njoftimit iranian, krahu detar i Gardës Revolucionare Islamike paralajmëroi se siguria e anijeve do të ishte në rrezik nëse ato i afroheshin Ngushticës së Hormuzit. Shtëpia e Bardhë nuk dha menjëherë koment.

Sipas Komandës Qendrore të SHBA-së, 55 anije tregtare kaluan nëpër ngushticë të shtunën. Ky ishte numri më i lartë ditor që nga fazat e hershme të luftës, por ende shumë më poshtë se mesatarja e para luftës, prej 130 anijesh në ditë.

Në Liban, armëpushimi midis Izraelit dhe Hezbollahut dukej fillimisht se po mbahej, por të shtunën dy palët shkëmbyen sërish zjarr. Mediat shtetërore libaneze raportuan sulme ajrore izraelite në qytete dhe qyteza në jug të Libanit.