Sekretari i Përgjithshëm i NATO-s: Strategjia e Putinit në Ukrainë nuk do të ketë sukses

Sekretari i Përgjithshëm i NATO-s, Jens Stoltenberg dënoi ashpër sulmet e reja raketore ruse në Ukrainë të premten, duke theksuar se strategjia ruse në atë vend nuk do të ketë sukses. Përpjekjet për të privuar popullin ukrainas nga uji, energjia elektrike dhe ngrohja është një sulm i qëllimshëm ndaj civilëve, tha Stoltenberg në një intervistë për DPA në Bruksel.

Kremlini ka bombarduar infrastrukturën energjetike të Ukrainës prej muajsh. Të premten, Rusia kreu sulme të reja në të gjithë Ukrainën, duke përfshirë Zaporizhia, Mykolaiv, Vinnytsia, Poltava, Dnipropetrovsk dhe Kharkiv. Në shënjestër ishte edhe Kievi.

"Putini e nënvlerësoi NATO-n"

Presidenti rus Vladimir Putin "po përpiqet të përdorë dimrin si një armë, duke kërkuar të thyejë popullin ukrainas në mënyrë që të minojë mbështetjen e tyre për vetëmbrojtje të Ukrainës", tha Stoltenberg. Por Sekretari i Përgjithshëm i NATO-s është i bindur se strategjia e Putinit nuk do të ketë sukses.

"Historia në fakt na mëson se ky lloj sulmi brutal ndaj civilëve nuk e dobëson vullnetin për të rezistuar, por vetëm e forcon atë," tha ai. Stoltenberg beson gjithashtu se Putini bëri një gabim të madh duke nënvlerësuar vendosmërinë e anëtarëve të NATO-s për të ndihmuar Ukrainën.

“Aleatët e NATO-s po i ofrojnë mbështetje Ukrainës në një shkallë të paprecedentë dhe e kanë bërë të qartë se do ta mbështesin atë për aq kohë sa të jetë e nevojshme”, tha ai. /Nacionale/