Rusia e gatshme të lejojë anijet me ushqime të largohen nga Ukraina në këmbim të heqjes së sanksioneve

Rusia është e gatshme të sigurojë një korridor humanitar për anijet që transportojnë ushqime që të largohen nga Ukraina, në këmbim të heqjes së disa sanksioneve, citon agjencia e lajmeve Interfax të mërkurën (25 maj) zëvendësministrin e Jashtëm rus, Andrei Rudenko.

Portet e Detit të Zi të Ukrainës janë bllokuar që kur Rusia dërgoi mijëra trupa në Ukrainë më 24 shkurt dhe më shumë se 20 milionë tonë drithë kanë ngecur nëpër depo.

Rusia dhe Ukraina përbëjnë gati një të tretën e furnizimeve globale të grurit dhe mungesa e eksporteve të konsiderueshme të grurit nga portet e Ukrainës po kontribuon në krizën globale ushqimore, e cila është vazhdimisht në rritje.

Ukraina është gjithashtu eksportues kryesor i misrit dhe vajit të lulediellit.

Fuqitë perëndimore kanë diskutuar idenë e krijimit të "korridoreve të sigurta" për eksportet e grurit nga portet e Ukrainës, duke shtuar se çdo korridor i tillë do të kishte nevojë për pëlqimin rus.

“Ne kemi deklaruar vazhdimisht në këtë pikë se zgjidhja për problemin e ushqimit kërkon qasje gjithëpërfshirëse, duke përfshirë heqjen e sanksioneve që janë vendosur ndaj eksporteve ruse dhe transaksioneve financiare”, citohet të ketë thënë Rudenko.

“Dhe gjithashtu duhet të bëhet çminimi nga pala ukrainase i të gjitha porteve ku janë të ankoruara anijet. Rusia është e gatshme të sigurojë kalimin e nevojshëm humanitar, gjë që e bën çdo ditë”, tha ai.

Rusia dhe Ukraina kanë akuzuar vazhdimisht njëra-tjetrën për vendosjen e minave në Detin e Zi.

Presidentja e Komisionit Evropian, Ursula von der Leyen, tha të martën se Rusia po përdor furnizimet ushqimore si një armë me pasoja globale.