Putin takohet me Xi-në, e falënderon për 'pozicionin e balancuar' ndaj Ukrainës
Në bisedimet e para ballë për ballë, që kur Rusia pushtoi Ukrainën, presidenti rus ka falëndruar presidentin kinez Xi Jinping, për “pozicionin e balancuar” ndaj Ukrainës.
Në takimin e mbajtur gjatë një samiti në Uzbekistan, sipas BBC-së, Xi u shpreh se Kina ishte e gatshme të punojë së bashku me Rusinë si “fuqi të mëdha”.
Edhe pse Kina nuk e ka mbështetur pushtimin e Rusisë, që nga fillimi i tij, vendi ka rritur në mënyrë të qëndrueshme lidhjet tregtare dhe lidhje të tjera me Moskën.
Takimi i dy liderëve në margjinat e samitit të Organizatës së Bashkëpunimit të Shangait (SCO) vjen në një pikë vendimtare në luftën në Ukrainë, ku ditët e fundit trupat ruse kanë humbur terren në disa pjesë të vendit.
Gjatë takimit të tyre të fundit në shkurt - kur Putin udhëtoi për në Pekin për Lojërat Olimpike Dimërore me ftesë të Xi-së, të dy u përpoqën të demonstronin lidhjet e tyre të ngushta, duke deklaruar në mënyrë të famshme se kishin një miqësi pa kufij.
E vetëm pak ditë më vonë Rusia pushtoi Ukrainën, duke shkaktuar dënime dhe sanksione ndërkombëtare kundër Moskës dhe duke vënë marrëdhëniet Kinë-Rusi nën një qendër të vëmendjes intensive.
Që atëherë Pekini ka kërkuar përfundimin e armiqësive dhe ka theksuar rëndësinë e sovranitetit. Por, gjithashtu ka refuzuar vazhdimisht ta quajë luftën një pushtim nga Rusia, udhëheqësit e së cilës i referohen asaj si një "operacion special ushtarak".
Çfarë kërkon Kina nga kriza e Ukrainës?
Në javët e fundit Kina ka dërguar trupa për të marrë pjesë në stërvitjet e përbashkëta ushtarake me Rusinë dhe ka dërguar zyrtarë të lartë për të takuar homologët rusë për të riafirmuar lidhjet e tyre të ngushta. Vendi gjithashtu i ka ardhur në ndihmë ekonomike Rusisë në një kohë të sanksioneve ndëshkuese të vendosura nga Perëndimi.
Kjo ka qenë një fitore e favorshme për të dy vendet, pasi me uljen e varësisë së Evropës nga nafta dhe gazi rus, Kina ka rritur blerjet e saj të produkteve energjetike, të cilat thuhet se po i merr me tarifa më të ulëta.
Muajin e kaluar Pekini gjithashtu ra dakord të paguante për gazin në rubla ruse dhe juan kinez, duke i dhënë Moskës një alternativë shumë të nevojshme ndaj dollarëve si rezervë valutore, ndërkohë që nxiti interesat e Kinës për të rritur juanin si monedhë ndërkombëtare.
Megjithatë, raportet e inteligjencës amerikane thonë se Moska është aq e dëshpëruar për armë sa që i është drejtuar Iranit dhe madje edhe Koresë së Veriut për furnizime, dhe gjithashtu i është afruar Kinës - por deri më tani nuk ka pasur asnjë tregues që Pekini ka rënë dakord.
Disa ekspertë besojnë se pavarësisht pamjes së miqësisë së pikturuar si nga Kina ashtu edhe nga Rusia, Xi do të dëshirojë të mbajë një distancë midis tij dhe Putinit për disa arsye.
