Protestat në Iran: Qeveria u ndali internetin, iranianëve u del në ndihmë ShBA-ja
Mes mbylljeve të internetit nga qeveria iraniane përballë protestave të përhapura, Sekretari Amerikan i Shtetit Antony Blinken ka njoftuar se qeveria amerikane ka ndërmarrë një hap që synon të lejojë firmat e teknologjisë të ndihmojnë popullin e Iranit të aksesojë informacionin në internet.
“Është e qartë se qeveria iraniane ka frikë nga njerëzit e saj”, tha Blinken në një deklaratë, duke shtuar se, "Mahsa Amini ka vdekur pa kuptim, tragjikisht dhe tani qeveria po shtyp dhunshëm protestuesit paqësorë të zemëruar me të drejtë për humbjen e saj."
Blinken tha se Departamenti i Thesarit ka lëshuar një licencë të përgjithshme, e cila autorizon disa transaksione të cilat përndryshe do të ndaloheshin nën sanksione, "për të çuar përpara përpjekjet dhe angazhimet tona për të siguruar që populli iranian të mund të aksesojë lirisht informacionin në internet".
Ai shtoi se, "qeveria iraniane ka ndërprerë aksesin në internet për shumicën e 80 milionë qytetarëve të saj për t'i parandaluar ata - dhe botën - të shikojnë shtypjen e saj të dhunshme ndaj protestuesve paqësorë."
Blinken më tej tha se ShBA do të ndihmojë që populli iranian të mos mbahet i izoluar dhe në errësirë.
"Ne do të ndihmojmë që populli iranian të mos mbahet i izoluar dhe në errësirë. Ky është një hap konkret për të ofruar mbështetje kuptimplotë për iranianët që kërkojnë respektimin e të drejtave të tyre themelore," tha ai.
Sipas Departamentit të Thesarit, licenca e përgjithshme zgjeron kategoritë e softuerëve dhe shërbimeve që mund të ofrohen "për të përfshirë platformat e mediave sociale, platformat e bashkëpunimit, videokonferencat, si dhe shërbimet e bazuara në cloud", jep "autorizim shtesë për shërbimet që mbështesin mjetet e komunikimit për të ndihmuar iranianët e zakonshëm që t'i rezistojnë censurës shtypëse të internetit dhe mjeteve të mbikëqyrjes të vendosura nga regjimi iranian, dhe "heq kërkesën për të verifikuar që komunikimet janë "personale" në natyrë".
Thesari po ashtu tha se, licenca "vazhdon të autorizojë softuerët anti-virus dhe anti-malëare; softuerët kundër gjurmimit; sistemet operative celulare dhe softuerët përkatës; mjetet kundër censurës dhe softuerët përkatës; softueri i klientit të Rrjetit Virtual Privat (VPN); dhe softuerët përkatës", duke vënë në dukje se "këto mjete mbrojnë aftësinë e iranianëve për t'u angazhuar në shprehje të lirë dhe për t'i rezistuar me guxim shtypjes së regjimit."
