Pas Ukrainës, raportohet se Orbani do të shkojë në Rusi, reagojnë BE-ja e Polonia

Udhëheqës të tjerë të BE-së kanë shprehur shqetësim rreth raportimeve të mediave se kryeministri hungarez, Viktor Orban, mund ta takojë të premten në Moskë presidentin rus, Vladimir Putin.

Orbani, vendi i të cilit tani e ka presidencën e përkohshme të BE-së, është udhëheqësi i vetëm i një vendi të bllokut që ka mbajtur lidhje të ngushta me Kremlinin pas fillimit të pushtimit të plotë rus të Ukrainës, raporton televizioni BBC.

Presidenti i Këshillit Evropian, Charles Michel, tha se Orbani “nuk ka mandat për t’u angazhuar me Rusinë në emër të BE-së”, ndërsa kryeministri polak, Donald Tusk, kërkoi sqarim.

Disa media raportuan rreth vizitës së mundshme të Orbanit në Moskë, duke i cituar burimet e tyre.

Gazeta “The Financial Times” raportoi se një zyrtar hungarez dhe dy të BE-së i kishin konfirmuar raportimet e mediave se Orbani do të takohet me presidentin rus të premten.

Radio “Evropa e Lirë”, media e financuar nga Shtetet e Bashkuara, citoi një burim qeveritar hungarez. Kjo radio gjithashtu tha se Orbani do të shoqërohet nga ministri i Jashtëm i Hungarisë, Peter Szijjarto.

Hungaria dhe Rusia nuk iu përgjigjën menjëherë kërkesave të BBC-së për koment.

Të hënën, sipas agjencisë AFP, Orbani premtoi “lajme të befasishme nga vende të befasishme”.

Në një shkrim të publikuar në rrjetin X, Michel tha: “Presidenca e përkohshme e BE-së nuk ka mandat për t’u angazhuar me Rusinë në emër të BE-së. Këshilli Evropian është i qartë: Rusia është agresorja, Ukraina është viktima. Nuk mund të mbahet asnjë diskutim për Ukrainën pa Ukrainën.”

The EU rotating presidency has no mandate to engage with Russia on behalf of the EU.

The European Council is clear: Russia is the aggressor, Ukraine is the victim. No discussions about Ukraine can take place without Ukraine.

— Charles Michel (@CharlesMichel) July 4, 2024

Kryeministri polak pyeti: “Thashethemet për vizitën tënde në Moskë nuk mund të jenë të vërteta, @PM_ViktorORban, apo munden?”

Më herët këtë javë, kryeministri hungarez e vizitoi Ukrainën, duke thënë se “një armëpushim i shpejtë do të mund të përdorej për t’i përshpejtuar bisedimet e paqes”.

Presidenti ukrainas, Volodymyr Zelensky, i cili ka pasur marrëdhënie të ftohta me Orbanin, nuk iu përgjigj publikisht propozimit.

Megjithatë, shumë ukrainas besojnë se një armëpushim vetëm do ta betononte kontrollin e Rusisë në territoret që ia ka marrë Ukrainës.

Spekulimet e mediave për vizitën e mundshme të Orbanit në Moskë u bënë në kohën kur presidenti rus përsëri tha se ishte i hapur për bisedime me Ukrainën.

Putini rishtazi ka paraqitur një grumbull të parakushteve të vështira për bisedime të paqes, por Kievi dhe aleatët e saj perëndimorë thonë se ato do të ishin të barabarta me kapitullimin e Ukrainës./Nacionale