Një vajzë në Angli u vra pasi një burrë i armatosur hyri në shtëpinë e saj

Vajza nëntë vjeçare Olivia Pratt-Korbel u vra në Liverpool pasi një person i armatosur hyri në shtëpinë e familjes së saj ndërsa ndiqte një burrë tjetër që nuk jetonte atje.

Policia e Merseyside tha se vajza u qëllua teksa po bëhej gati për të fjetur. Policia thotë se familja është absolutisht e pangushëllueshme për shkak të tragjedisë.

Policia tha se nëna e Olivia-s, Cheryl Korbel, iu përgjigj derës së përparme në Kingsheath Avenue për të parë se çfarë po ndodhte pasi dëgjoi të shtëna armësh në rrugë. Më pas një 35-vjeçar hyri me forcë në shtëpi, i ndjekur nga sulmuesi.

Sulmuesi qëlloi një seri të shtënash dhe nuk i kushtoi vëmendje Olivia-s dhe familjes së saj, të cilët nuk kishin asnjë lidhje me sulmuesin apo njeriun që hyri me forcë në shtëpinë e tyre, tha policia.

Vajza ka ndërruar jetë në spital

Përveç Olivias është qëlluar edhe nëna e saj, e cila ka përfunduar me një plumb në kyçin e dorës. Burri që hyri në shtëpinë e tyre u qëllua disa herë në pjesën e sipërme të trupit.

Më pas një mik i 35-vjeçarit e ka marrë dhe e ka dërguar në spital, duke lënë pas Olivian. Policia mbërriti shpejt dhe e dërgoi vajzën në spitalin e fëmijëve Alder Hey ku ajo vdiq. Nëna e Olivias dhe 35-vjeçari i plagosur ndodhen në spital për shkak të plagëve të marra.

Për vrasjen foli edhe kryeministri britanik Boris Johnson, i cili shkroi në Twitter se të shtënat në Liverpool ishin të tmerrshme dhe se policia Merseyside do të marrë gjithçka që i nevojitet për të kapur vrasësin e Olivias dhe për të vënë drejtësi.

Një varg vrasjesh në Merseyside

Vrasja e Olivias është e fundit në një varg vrasjesh me armë zjarri dhe policia në Merseyside gjatë javës së kaluar. Policia është ende duke hetuar të shtënat e së dielës në të cilën 28-vjeçarja Ashley Dale, një oficere e shëndetit mjedisor në Knowsley Council, u vra. Detektivët thonë se Dale nuk ishte objektivi i vërtetë i sulmit dhe vrasësit e identifikuan gabimisht personin.

Një 32-vjeçar u arrestua me dyshimin për vrasje në Kirkby mbrëmjen e së hënës, pasi një grua rreth të 50-tave u gjet e goditur me thikë për vdekje në një park makinash në një lokal. Policia është thirrur në trazirën ku edhe një burrë rreth të 30-ave ka pësuar plagë në krah dhe trup.

Mbrëmjen e së martës së kaluar, 22-vjeçari Sam Rimmer u qëllua për vdekje në zonën e Dingle. Policia është në kërkim të dy personave me veshje të errëta, të cilët janë parë duke u larguar nga vendi i ngjarjes me biçikleta elektrike. Muajin e kaluar, një djalë 15-vjeçar u burgos për vrasjen e 12-vjeçares Ava White në natën e ndezjes së dritave të Krishtlindjeve në qendër të qytetit të Liverpool-it. /Nacionale/