Kryetari i një qyteti në Filipine i urdhëron punëtorët që të qeshin
Një kryetar qyteti në Filipine i ka urdhëruar të gjithë punëtorët lokalë qeveritarë që të qeshin gjatë orarit të punës dhe kërcënoi se do të marrë masa disiplinore kundër atyre që nuk e zbatojnë këtë urdhër.
Aristotle Aguirre, kryetar i komunës Mulanay, po mundohet që ta luftojë problemin e disponimit të ulët të stafit duke nënshkruar një urdhër ekzekutiv për zbatimin e “politikës së buzëqeshjes”.
Në urdhër thuhet se kjo politikë do të jetë në mesin e programeve kryesore të administratës dhe “do të ofrojë sinqeritet duke i shfaqur ndjenjën e qetësisë dhe atmosferën miqësore”.
“Secili punëtor/zyrtar që zbulohet përmes veprimeve të duhura që e ka shkelur këtë urdhër, përbën bazë të mjaftueshme për përgjegjësi administrative në përputhje me ligjet, politikat, udhëzimet, rregullat dhe rregulloret ekzistuese”, thuhet në urdhër.
Aguirre nuk është zyrtari i vetëm që po këmbëngul se punëtorët e administratës duhet të jenë më të gëzueshëm. Kevin Anarna, kryetar i zgjedhur rishtazi i qytetit Silang, i ka udhëzuar punëtorët që të mos kenë fytyrë të vrenjtur.
“Para të gjithave, duhet të jetë: kur shkon në sallën komunale sot, të gjithë punëtorët duke qeshur. Të vrenjturit është i ndalur”, tha Anarna.
Ai gjithashtu tha se zyrtarët dhe punëtorët duhet të veshin rroba të bardha, e jo rroba me ngjyra që lidhen me kampe të caktuara politike, për t’u siguruar që të gjithë qytetarët të ndihen njësoj të mirëseardhur.
