Hong Kongu “qesh” me sanksionet amerikane, pas thirrjeve për kapjen e jahtit rus
Një superjaht i cili dyshohet se është në pronësi të manjatit rus të çelikut Alexey Mordashov i cili është një objektiv i sanksioneve të ShBA-së, është ankoruar javën e kaluar në Hong Kong.
E mes thirrjeve të ShBA-së, për të kapur jahtin, udhëheqësi i Hong Kongut, John Lee, tha se ai "qesh me" sanksionet e Shteteve të Bashkuara.
Sipas Deutche Welle, superjahti Nord, 141.6 metra i gjatë, që dyshohet se është në pronësi të Mordashov, ka mbërritur në portin aziatik të mërkurën e kaluar.
Por, të martën, Lee tha se Hong Kongu është në përputhje me sanksionet e Kombeve të Bashkuara, duke shtuar se masat e synuara nga ShBA, Mbretëria e Bashkuar ose Bashkimi Evropian – të cilat secila sanksionojnë Mordashov, nuk zbatohen në Hong Kong.
"Ne nuk mund të bëjmë asgjë që nuk ka bazë ligjore," u tha Lee gazetarëve. "Ne do të respektojmë sanksionet e Kombeve të Bashkuara, ky është sistemi ynë, ky është sundimi ynë i ligjit."
Komentet e Lee vijnë një ditë pasi Departamenti Amerikan i Shtetit tha se "përdorimi i mundshëm i Hong Kongut si një strehë e sigurt nga individë që shmangin sanksionet nga juridiksione të shumta vë në pikëpyetje më tej transparencën e mjedisit të biznesit".
“Reputacioni i Hong Kongut si qendër financiare varet nga respektimi i ligjeve dhe standardeve ndërkombëtare”, shtoi Departamenti i Shtetit.
Vetë Lee është një nga disa zyrtarë kinezë që u sanksionuan nga ShBA në 2020 për rolin e tij në goditjen e lirive politike në qytet.
"Ne thjesht do të qeshim me të ashtuquajturat sanksione," shtoi shefi ekzekutiv i Hong Kongut.
Pse është i diskutueshëm ky superjaht?
Nord është një superjaht prej 500 milionë dollarësh (516 milionë euro) që dyshohet se është në pronësi të Mordashov.
Anija 141.6 metra e gjatë (464.6 këmbë) ka 20 kabina dhe përmban një pishinë dhe dy platforma helikopterësh.
Ndërsa, pasuria e Mordashov, një nga njerëzit më të pasur të Rusisë, vlerësohet në 18 miliardë dollarë. Ai është aksionari dhe kryetari kryesor i Severstal, kompania më e madhe ruse e çelikut dhe minierave, dhe besohet se ka lidhje të ngushta me presidentin Vladimir Putin.
Kujtojmë se, më herët gjatë vitit, autoritetet amerikane dhe evropiane kapën më shumë se një duzinë superjahte që u përkisnin miliarderëve rusë të sanksionuar. Megjithatë, disa nga këta individë kanë arritur të shmangin sanksionet duke ankoruar anijet e tyre në vende si Turqia apo Emiratet e Bashkuara Arabe.
