Gjithnjë e më shumë fëmijë në Gjermani jetojnë në rrezik të varfërisë

Shumë fëmijë në Gjermani janë në rrezik të varfërisë, raportojnë mediat gjermane, duke thënë se kjo përqindje në vitin 2021 ishte 20.8. “Në vitin 2021, 20,8 për qind e të miturve në Gjermani jetonin në familje të prekura nga varfëria”, njofton media, duke iu referuar informacionit të publikuar nga qeveria gjermane me kërkesë të partisë së Majtë.

Sipas statistikave aktuale, një familje me më pak se 60 për qind të të ardhurave mesatare konsiderohet e varfër. Për një familje me katër anëtarë, ky kufi në Gjermani është 2904 euro në muaj. Përqindja e të miturve që jetojnë në rrezik të varfërisë është rritur nga 19.7 në 20.8 për qind që nga fillimi i matjes së kësaj vlere në vitin 2015.

Shtrëngimi i situatës financiare

Dietmar Bartsch, presidenti i grupit parlamentar të partisë së majtë, paralajmëroi në të përditshmen Augsburger Allgemeine për mundësinë e shtrëngimit shtesë të situatës financiare për familjet me fëmijë. “Për shkak të inflacionit dhe rritjes së shpejtë të çmimeve të energjisë, rreziku i rritjes së numrit të fëmijëve që jetojnë në varfëri po rritet”, tha Bartsch.

Ai kërkoi nga qeveria gjermane, krahas masave standarde të mbështetjes financiare për qytetarët, të vendosë një mekanizëm të veçantë që do të mbronte fëmijët nga varfëria për shkak të inflacionit dhe rritjes së çmimit të energjisë. /Nacionale/