Gjenerali gjerman: Rusia mund të jetë gati për ta sulmuar NATO-n brenda 5 – 8 vjetësh
Komandanti i ushtrisë gjermane, Gjeneral Carsten Breuer, ka thënë se Rusia mund të jetë e gatshme ushtarakisht për të sulmuar shtete të NATO-s brenda pesë deri tetë vjetëve, nëse Moska vendos që ta bëjë këtë veprim, porsa t’i ketë rindërtuar forcat e goditura nga ndikimi i luftës në Ukrainë.
“Deri atëherë, duke u mbështetur në analizën tonë, Rusia do t’i ketë rikonstituuar forcat e veta në një shkallë që një sulm kundër tokës së NATO-s do të mund të ishte i mundshëm” – tha Breuer para gazetarëve gjatë një vizite në Poloni, raporton agjencia “Reuters”.
“Unë nuk po them që kjo do të ndodhë, por që mund të jetë e mundshme” – shtoi gjenerali gjerman të mërkurën vonë.
Nga 32 vendet e NATO-s, gjashtë shtete evropiane kufizohen me Rusinë: Norvegjia, Finlanda, Estonia, Letonia, Lituania dhe Plonia.
Rusia tani duket se është në epërsi në Ukrainë, ku konflikti po karakterizohet nga lufta nëpër llogore, e ngjashme me Luftën e Parë Botërore, dhe luftimet me dronë të teknologjisë së lartë.
Forcat ruse tani kontrollojnë gati një të pestën e territorit ukrainas, përfshirë Gadishullin e Krimesë, që ishte aneksuar më 2014.
“Ne shohim që Rusia është duke prodhuar shumë materiale për zhvillim lufte dhe nuk është duke e vënë tërë këtë material në vijën e frontit në Ukrainë, prandaj më 2029 duhet të jemi gati. Ajo që ne shohim është një kërcënim brenda pesë deri tetë vjetësh” – tha oficeri më i lartë ushtarak i Gjermanisë.
